ВАШИНГТОН. /CNN/. “Pfizer” компани коронавирусний “омикрон” хувилбарын эсрэг шинэ вакцин шаардлагатай болсон тохиолдолд гуравдугаар сар гэхэд гарган авах боломжтой гэж тус компанийн тэргүүн Альберт Бурла мягмар гарагт мэдэгджээ. Мөн вирусний эсрэг эм нь шинэ хувилбарын эсрэг үйлчилнэ гэдэгт итгэлтэй байна хэмээн хэлсэн байна.
“Wall Street Journal” сониноос зохион байгуулдаг "Гүйцэтгэх захирлуудын зөвлөлийн дээд түвшний уулзалт"-ын үеэр А.Бурлагаас “омикрон” хувилбарт зориулсан вакциныг гарган авах ажил үргэлжилж байгаа эсэхийг тодруулахад, ийм вакцин шаардлагатай тохиолдолд бид гуравдугаар сар гэхэд гарган авах боломжтой гэж бодож байна хэмээн хариулжээ. Түүнчлэн одоогоор шинэ вакцин шаардлагатай эсэх нь тодорхойгүй байгааг онцлоод, энэ бүхэн ойрын долоо хоногуудад тодорхой болно гэв.
А.Бурла “Pfizer”-ын дотуур ууж хэрэглэдэг вирусний эсрэг эм болох “Паксловид”-ын талаарх асуултад, “Бид эмээ саяхан илрээд буй шинэ хувилбар, мөн өмнө нь илэрсэн бүх хувилбарын эсрэг үйлчилнэ гэдэгт маш их итгэлтэй байна”. Ихэнх мутаци өргөс уураг дээр явагдаж байгаа бол протеазын дарангуйлагч эм нь уг уурагт “ажилладаггүй” гэж тэрбээр тайлбарласан байна.
Э.Хулан
Эх сурвалж: Монцамэ агентлаг
