П.Анужин гишүүн 15-н жилийн өмнө хүүхдийн асрамж нээж байснаа дурсжээ.

Сэтгэл баяртай бас гунигтай…

Одоогоос 15 жилийн өмнө “Эрдэм” хэмээх хүүхэд асран хамгаалах төвийг байгуулж байсан юм.

Эрдэм төв маань 100 орчим хүүхдийг хөлийг нь дөрөөнд, гарыг нь ганзаганд хүргэсэн. 15 жилийн өмнө ирэхдээ “би анх удаа торт идэж байна, хүний ёсоор төрсөн өдрийг минь хийж өгсөн та нартаа баярлалаа” хэмээн уйлж байсан охин маань одоо 3 хүүхдийн ээж болсон.

Өнөөдөр тус төвд өсөж буй маамаа нарын хамгийн бага нь 9 хоногтой ирж байсан, 2 ой өнгөрч явна. Амралтын өдөр, авто замын бөглөрөл гайгүй дээр, хүүхдүүддээ шинэ жилийн бэлэг, дуртай тахиаг нь аваачиж өглөө. Мөн сарынхаа цалинг энэ хэддээ өгчихлөө. Дараагийн завтай өдрөө томчуудыг нь ( охид хөвгүүдээ) кинонд урьж, хамт цагийг өнгөрөөхөөр тохирлоо.

Улсаас нэг ч төгрөгийн татаас, дэм авч үзээгүй уг төвийг маань өдий дайтай авч яваа А.Өнөр эгчдээ чин сэтгэлээсээ талархаж байна, “Эрдэм” төвийг ковидгүй байлгах гэж жил гаран гэртээ харилгүй хүүхдүүдтэйгээ хамт байгаа…. Үүний дүнд эдний хамт олон “Ногоон бүс” байсаар байгаа! Тус төвд ирсэн төрөлхийн сонсголгүй маамааг Өнөрөө эгч өөрөө үрчлэн авч, хөөцөлдөж гүйж, эмнүүлж сонсголтой болгож, одоо хүү нь торохгүй ярьж байгаа. Магтах сайн үг багадаж байна. Өрөөлийн байтугай өөрийн хүүхдийг өсгөж, тэтгэх амаргүй! “Эрдэм” төвийн галыг бөхөөхгүй, мандаан бадрааж, хүнээр хийж яваа их үйлстэн шүү та минь!

Эрдмийн хүүхдүүдийн тархинд асрамжийн газар гэсэн сэтгэл зүй байхгүй, тэд сэтгэлийн амгалантай, тайван орчинд өсөж буй.

Энэ төвийг үүсгэн байгуулж, өөрсдийн орлого, боломжоо илүүчилж өрөөлийн хүүхдийг өсгөөд өгье хэмээн шийдсэн үеийг эргэн санахад нас 30 дөнгөж гарч байж. Анхны хүүхэд гэдсэнд, хүний 30 хүүхдийг хүлээж авсан үе л дээ… Асар их зориг байждээ хэмээн өнөөдөр бодож суулаа. Сэтгэлээс гадна зориг байж байж л хүн аливааг эхлүүлдэг юм байна. Огт мэдэхгүй ТВ салбарт ч “Монгол Тулгатан”-г эхлүүлж байсан маань зориг! Баярлалаа миний гучаад нас! 🙂

Анхны авч байсан хүүхдүүд маань эрийн цээнд хүрснийг бодож, одоо байгаа нялхуудын нүдэнд нь гуниг хураагүйг харж, монголын 100 хүүхдийн хазайгаагүй хувь тавиланд залбирч энэ тухай анх удаа бичиж байна… Би, бид хэмжээгүй хөрөнгөтөн огт биш, нийгэм нийтийн сайн сайхны төлөө амаа биш хуруугаа чадахаараа хөдөлгөх ёстой л гэж хичээдэг гэр бүл, хань, ах дүүс билээ.

Үр хүүхэддээ сайн “аав ээж” байх эрх хүн бүхэнд нээлттэй! Энэ заяагдмал эрхээ л ханатал эдлээрэй аав ээжүүдээ!