БНСУ-д 13 настай монгол охин бусдад зодуулсан хэрэгт буруутай этгээдүүдэд хуулийн хариуцлага хүлээлгэхийг шаардаж Монголчууд БНСУ-ын Ерөнхийлөгчид хандан хүсэлт гаргаж санал цуглуулсан. Энэ санал 200 мянган хүн санал өгвөл дээрх хэрэг БНСУ-ын Ерөнхийлөгч Мүн Жэ Ин-ий анхааралд очиж, хэргийг авч хэлэлцдэг. Монголчуудын санал 200 мянга хүрсэн ч БНСУ-ын Ерөнхийлөгч энэ талаар ямар нэгэн шийдвэр хэлэхгүй байгаад олон нийт гайхаж байна.

Энэ талаар Гадаад харилцааны сайд Б.Батцэцэг хариулт өгсөн юм. Тэрбээр "БНСУ-ын Ерөнхийлөгчийн вэб сайт дээр аливаа асуудлаар санал асуулга явуулаад 200 мянгад хүрвэл уг асуудлыг авч хэлэлцээд ямар арга хэмжээ авах вэ гээд дараагийн шатны процесс болдог юм байна лээ. 200 мянган саналыг 30 хоногийн дотор цуглуулах ёстой. Манай санал 200 мянга хүрчихсэн. Тэгэхдээ гуч хоногийн хугацаа нь дуусаагүй байгаа юм байна лээ. Нэг сарын эхээр 30 хоног нь болно. Тэгээд Засгийн газар нь ямар арга хэмжээ авах вэ гэдгээ тодорхойлох байх.

Бид нар Солонгосын Гадаад харилцааны яамтай маш ойрхон ажиллаж тухайн хүүхэдтэй холбоотой сургууль, хууль хяналтын бүхий л шатны байгууллагуудтай уулзалт хийж байгаа. Энэ хэргийн хувьд хоёр бага хүүхдийнх нь хэрэг бол хаагдсан. Хоёр том арван дөрөв, тавтай хүүхдүүдийнх нь үргэлжилж байгаа. Цагдаагийн байгууллага гурван үндэслэлээр нэмж, хэрэг үүсгэж шалгаж байгаа юм байна лээ." гэлээ.

toim.mn