Өчигдөр буюу Даваа гарагт Apple компани зах зээлийн үнэлгээ нь $3 их наядын босгыг давсан анхны Америк компани болж түүхэнд бичигдлээ.

Тус компани 2018 оны наймдугаар сард дэлхийн анхны нэг их наядын үнэлгээтэй компани болж байв.

Улмаар 2020 онд зах зээлийн үнэлгээ нь $2 их наядын босгыг давж байжээ.

Даваа гарагийн арилжаа нээгдэхэд Apple-ийн нэгж хувьцааны үнэ $182.80 хүрснээр үнэлгээ нь гурван их наядад хүрсэн юм. Арилжаа хаагдах үед хувьцааны үнэ бага зэрэг буурснаар $2.9 их наяд орчмын үнэлгээнд хүрчээ.

Apple-ийн зах зээлийн үнэлгээ нь одоо Boeing, Coca-Cola, Disney, Exxon-Mobil, McDonald’s, Netflix, Walmart компаниудын үнэлгээг нийлүүлснээс өндөр болоод байна.

2021 оны эхнээс тус компанийн хувьцааны үнэ 38 хувиар өссөн юм.

Энэ үзүүлэлтээрээ Dow Jones industrial average хөрөнгийн зах зээлийн индексийг бүрдүүлэгч компаниуд дотроос хамгийн өндөр өсөлт гаргаснуудын нэгд тооцогдож байна.

Мэргэжилтнүүдийн тооцоолсноор Майкрософт компани Аpple-ийн дараа энэ оны сүүлээр гурван их наядын үнэлгээнд хүрч магадгүй гэнэ.

Хэдийгээр коронавирусийн Омикрон хувилбарын тархалт өндөр байгаа ч хөрөнгө оруулагчид 2022 оныг эдийн засгийн сэргэлтийн жил болно гэж үзэж байна.

Тиймээс шинэ оны эхний өдрийн арилжааны үеэр Америк, Европын хөрөнгийн зах зээлүүдийн гол индексүүд өндөр өсөлттэй хаагджээ.

Эх сурвалж: The Guardian