Т.САЙХАН

Ерөнхийлөгч У.Хүрэлсүх 2027 онд орох Оюутолгойн ногдол ашгийг хэрхэн зарцуулах талаар Ерөнхий сайд Н.Учрал, Сангийн сайд З.Мэндсайхан нарыг дуудан уулзаж, чиглэл өглөө. Тэрээр “Би D.Parliament руу орж үзсэн. 100 мянга гаруй иргэн саналаа өгснөөс дийлэнх нь Оюутолгойгоос орж ирэх ногдол ашгийг өөрсдийнхөө дансанд авах нь зүйтэй гэсэн санал өгсөн байна лээ. Ард түмнийхээ өгсөн саналд хүндэтгэлтэй хандаж, анхаарах ёстой. Нөхцөл байдал дэлхий даяар хүнд байна. Эрчим хүч, бензин шатахуун үнэд орсон. Би сая Европын холбооны улсуудад төрийн айлчлал хийгээд ирсэн. Европт ч гэсэн байдал маш хүнд байна. Биднээс шалтгаалахгүй зүйл ч бас бий. Байгалийн баялгийнхаа эхний хишгийг орж ирсэн тухай бүрд нь ард иргэдийнхээ дансанд шилжүүлэх нь чухал гэж бодож байна. Дайн тулаан, гадаад амаргүй нөхцөл байдлыг амжилттай давахын тулд ард иргэдийнхээ амьдрал ахуйг анхаарах, өрхийн орлогыг хамгаалах чиглэлд яаралтай арга хэмжээ авах шаардлагатай. Тийм учраас байгалийн баялгийнхаа эхний хишгийг орж ирсэн тухай бүрд нь ард иргэдийнхээ дансанд шилжүүлэх нь чухал гэж бодож байна. Хамгийн гол нь, та бүхэн хөрөнгө оруулагч талтай гэрээ хэлэлцээрээ маш сайн хийх хэрэгтэй. Мөнгийг дансанд хэзээ, яаж хийх талаар Засгийн газар хууль эрх зүйн хүрээнд дүрэм журмаа боловсруулаад ажиллах хэрэгтэй. Гурван их наядаас орж ирсэн тухай бүрд нь иргэдийнхээ дансанд шилжүүлэхэд онцгой анхаарах хэрэгтэй. Дэлхий даяар бий болсон бараа бүтээгдэхүүний үнийн өсөлт, бензин шатахууны хомсдол, тээвэр ложистикийн саад бэрхшээл нь улс орнуудын эдийн засагт цохилт өгч байна. Энэ нөхцөл байдал нь манай улсын эдийн засаг, ард иргэдийн амьдралд шууд нөлөөлж, өрхийн худалдан авах чадвар буурч, томоохон сорилттой бид нүүр тулж байна. Иймд Монгол Улсын Ерөнхийлөгчийн хувьд баялгийн өгөөжийг иргэн бүрд хүртээх нь цаг үеийн шаардлагад нийцсэн шийдвэр болно гэж үзэж, өөрийн байр сууриа Монгол Улсын Ерөнхий сайдад илэрхийллээ. Төр, засгийн зүгээс ард иргэддээ хямралыг даван туулахад шуурхай хариу арга хэмжээг авч, эдийн засгийн өсөлтийг нэмэгдүүлэхэд онцгой анхаарч ажиллах шаардлагатай гэдгийг мөн онцлов.

Тэгвэл энэ талаар Сангийн сайд З.Мэндсайхан сэтгүүлчдийн асуултад хариуллаа.Тэрээр “Ерөнхийлөгч У.Хүрэлсүх өчигдөр Засгийн газарт чиглэл өгсөн. Оюу толгойн ногдол ашгийг иргэд дансандаа авах хүсэлт гаргасан байна. Нийт 100 мянган иргэн гарын үсэг зурсан. Иргэдийн амьдрал хүнд, Монголбанкны бодлогын хүү өссөнтэй холбоотойгоор зах зээл дээр мөнгөний дутагдал үүсэж байгаа энэ үед Оюу толгойгоос авах ногдол ашгийг орж ирэх бүрд иргэдийн данс руу шилжүүл. Засгийн газар эрх зүйн зохицуулалтаа хий гэсэн чиглэл өгсөн.Гурван их наяд төгрөгийг зах зээлд нийлүүлбэл инфляц мэдээж өснө. Гэхдээ ийм хүнд цаг үед иргэдийнхээ орлогыг нэмэгдүүлэх чиглэлээр Засгийн газар ажиллана. Баялгийн сангийн тухай хуулиар Хуримтлалын санд Оюу толгойн ногдол ашиг төвлөрөх ёстой байсан бол одоо хоёр их наяд төгрөгийг иргэдэд бэлнээр олгохын тулд хуульд өөрчлөлт оруулна” гэлээ.

Эх сурвалж: “Зууны мэдээ” сонин

2026 ОНЫ АРАВНЭГДҮГЭЭР САРЫН 4. ЛХАГВА ГАРАГ. № 210 (7952)