Сэтгүүлчдийн амь насанд заналхийлсэн асуудлаар Сэтгүүлч У.Оргилмаа, Н.Өнөрцэцэг, Ч.Лодойсамбуу, Г.Мөнхтуул, Ж.Мядагбадам, Н.Баасандамба, Ч.Доржбат нар мэдээлэл хийлээ.
Энэ үеэр сэтгүүлч Н.Өнөрцэцэг: " УИХ-ын гишүүн, БСШУ-ны сайд, элчин сайд асан Ё.Отгонбаяр сэтгүүлчид рүү хийсэн сүрдүүлэгтэй холбоотойгоор хэвлэлийн хурал хийж байна. Энэ асуудал юунаас үүдэлтэй вэ? гэхээр өнгөрсөн 7 хоногт Хөгжлийн банкнаас гаргасан нийт зээлийн 55,3 хувь нь чанаргүй байгаатай холбоотой мэдээллийг олон нийтэд гаргасан. Цаашдаа ч энэ компаниудын тоо нэмэгдэх байх. Эдгээр компанийн ард хэн байна вэ? гэдэг үүднээс судалгаа хийж эхэлсэн. Ихэнхи нь улстөрчидтэй хамааралтай байгаа нь баримтаар нотлогдсон. Ё.Отгонбаярын эхнэрийн хувьцаа эзэмшдэг компани Хөгжлийн банкнаас 17,7 тэрбум төгрөгийн зээл авсан байдаг .Ё.Отгонбаяр сайд ХОМ-тээ "Нүүдэлчин групп" гэж тусгасан . "Нүүдэлчин групп"-ийг Ё.Отгонбаярын одоогийн эхнэр Ш.Батнасан гэж эмэгтэй эзэмшдэг.
Ё.Отгонбаяр энэ эмэгтэйтэй 2018 онд гэрлэсэн гэж өөрөө цахим хуудсанд бичсэн. 2018 онд "Нүүдэлчин" групп Хөгжлийн банкнаас зээл авсан. Ердөө энэ баримтыг л сэтгүүлчид гаргаж тавьсан. Гэвч Ё.Отгонбаяр намайг болон сэтгүүлч У.Оргилмааг заналхийлсэн. Бидэнд олон янзын дарамт шахалт ирдэг хэдий ч тэр бүр гаргаж тавьдаггүй. Энэ удаа амь насанд заналхийлсэн учраас ил болгож байна.
Өнөөдөр өглөө 07 цаг 34 минутад тэрээр над руу "Ах нь бухимдахдаа ёс зүйгүй үг хэрэглэжээ. Иймд ёс бус үг хэрэглэсэндээ харамсаж байна. Албан ёсоор ах нь чамаас уучлалт гуйж байгааг хүлээн авна уу" гэж байгаа юм. Уучлахгүй, үнэхээр уучлахгүй. Бид Ё.Отгонбаярын уурлахаараа ална шүү гэж хэлээд, стрессээ тайлдаг мешок юм уу? Тийм юм байхгүй. Энэ хүн эхнэрийнхээ компаниар авсан 17,7 тэрбум төгрөгийн зээлээ яаралтай төл. " гэв.
sonin.mn
