УИХ-ын гишүүн, Эрчим хүчний сайд Ц.Даваасүрэн Үндсэн хуулийн Цэцийн гишүүн Д.Сугарын бүрэн эрх болон бусад асуудлаар байр сууриа илэрхийлж, мэдээлэл хийв.

Тэрбээр мэдээллийнхээ эхэнд, Үндсэн хуулийн Цэцийн гишүүн Д.Сугарын бүрэн эрхийн хугацаа ирэх тавдугаар сард дуусах бөгөөд хугацаа нь дуусмагц АТГ-т өгч шалгуулна хэмээн мэдэгдлээ. Энэ талаар “Д.Сугар намайг өөрийнх нь нэр төрд халдлаа гэж Сүхбаатар дүүргийн шүүхэд хандсан юм байна билээ. Анх 2014 оноос МИАТ-ийн хэргээр ЦЕГ-аар шалгагдаж байгаад АТГ руу шилжээд, АТГ-аас Цэц, УИХ-д энэ хүний бүрэн эрхийн асуудлыг шийдэж өгөөч гэсэн хүсэлт тавьж байсан. Гэтэл ийм хүн Үндсэн хуулийн Цэцэд суугаад байж болохгүй шүү дээ. Яагаад энэ хүн ийм олон хэрэгт холбогдон, шалгагдаж байсан хэрнээ санаа зовохгүй байгааг гайхаж байна. Санаа зовохгүй байна гэдэг нь энэ хүний мөн чанарыг харуулж байна. Д.Сугар шиг хүмүүс төрийн чухал албан тушаал дээр очиж байгаа нь төрийн нэр хүндийг унагаж байна. Ирэх тавдугаар сард энэ хүний бүрэн эрхийн хугацаа дуусна. Бүрэн эрхийн хугацаа нь дуусахаар АТГ-т хандаж шалгуулна. Прокурор энэ хүний хэргийг хаасан юм юм билээ. Тиймээс энэ асуудлаар Ерөнхийлөгчид хандана” гэсэн юм.

Мэдээллийн дараа тэрбээр сэтгүүлчдийн асуултад хариулсан юм.

-Үндсэн хуулийн Цэцэд бүрэн эрхийн хугацаа нь дууссан хоёр ч гишүүн ажиллаж байна. Ирэх тавдугаар сард дахин хоёр гишүүний бүрэн эрхийн хугацаа дуусна. Тэгэхээр Д.Сугарыг чөлөөлж чадах уу?

-Д.Сугарыг УИХ-аас санал болгон анх Үндсэн хуулийн Цэцийн гишүүнээр томилж байсан. УИХ дахин ийм ичгэвтэр шийдвэр гаргана гэж бодохгүй байна. Олон хэрэгт холбогдоод байгаа ийм хүнийг буцаагаад томилж байвал энэ УИХ тарах хэрэгтэй. Ер нь Цэц ингэж хугацаа нь дууссан гишүүдээ байлгаад байж болохгүй шүү дээ. Дээрээ хөх тэнгэрээс өөр зүйлгүй гэдэг Цэц өөрөө хууль зөрчөөд байж болохгүй.

-Өмнийн бүсийн эрчим хүчний салбарт хамтарч ажиллах гэрээг цуцлаад сар гаруй хугацаа өнгөрлөө. Энэ хугацаанд Рио Тинто компанитай ямар нэгэн уулзалт, ярилцлага хийв үү? Тавантолгойн цахилгаан станцын төслийн явц ямар шатанд байна вэ?

-Энэ гэрээг хууль зөрчсөн учраас цуцалсан. Тодруулбал, Өмнийн говийн эрчим хүчний салбарт хамтран ажиллах гэрээ гэдэг дээр хөрөнгө оруулалтын гэрээний 7.3 буюу дөрвөн жилийн дотор Монгол Улсаас эрчим хүчээ авна гэсэн заалтыг зөрчсөн байсан. УИХ-аар баталсан гэрээнд өөрчлөлт оруулахад заавал УИХ-тай зөвшилцөх ёстой. Монголоос эрчим хүч авах асуудлыг Оюутолгой компанитай, хөрөнгө оруулагч талтай ярилцах шаардлагатай байна. Тиймээс энэ асуудлаар яаман дээр ажлын хэсэг томилоод байна.

-Ховд аймгийн Эрдэнэ бүрэн суманд баригдах цахилгаан станцын ажил ямар шатандаа явж байна вэ?

-Энэ цахилгаан станц нэлээд ач холбогдол өгч байгаа. Европын сэргээн босголтын банк ТЭЗҮ хийж өгье гэсэн санал тавьж байна. Өмнө нь урьдчилсан ТЭЗҮ хийж байсан бол энэ удаад нарийвчилсныг нь хийх юм.

Н.Туяа

Гэрэл зургийг Б.Чадраабал

Эх сурвалж: Монцамэ агентлаг