Хөгжлийн банкнаас авсан мөнгөө гол гаргаж, зээлээ та бидний төлсөн татвараар тэглүүлэх далд зорилготой улс төрчид тэдгээрийн хамаарал бүхий компаниудыг зүгээр өнгөрүүлж хэрхэвч болохгүй. Жирийн иргэдэд цалингийн зээл 12-15 хувийн хүүтэй, ахмадуудын тэтгэврийн зээл 10-12 хувийн хүүтэй олдож байхад үүнээс 2-4 дахин бага хүүтэй зээл авчхаад төлөлгүй луу унжсан этгээдүүдэд хуулийн хариуцлага тооцох нь шударга ёсонд нийцнэ.

Авсан зээлээ төлөөгүй этгээдүүдээс гадна чанаргүй зээл олгосон Хөгжлийн банкны үе, үеийн удирдлагуудтай хариуцлага тооцох хэрэгтэй. Олгосон зээлийнхэн тал хувь нь чанаргүй ангилалд багтаж, төрд 1.3 их наяд төгрөгийн хохирол учрах нөхцөлийг бүрдүүлсэн албан тушаалтнуудыг шалгахыг олон нийт шаардаж буй.

Тэгвэл шалгуулах ёстой хүмүүсийн нэг бол Эдийн засаг, хөгжлийн дэд сайд С.Наранцогт юм. Сангийн сайд асан Ч.Хүрэлбаатарын ойрын хүн гэгддэг С.Наранцогт нь Сангийн яамны газрын дарга, Төрийн нарийн бичгийн даргаар ажиллаж байгаад саяхан дэд сайд болж тушаал дэвшсэн хүн. Тэрбээр 2018 оноос хойш Хөгжлийн банкны ТУЗ-д гишүүнээр ажиллаж байгаа бөгөөд сүүлд тус банкны ТУЗ-ийн дарга болж мөн л тушаал ахисан байдаг. С.Наранцогттой сүүлийн 3 жилд “Хөгжлийн банк”-аас олгосон чанаргүй зээлүүд хамааралтай.

Учрыг нь тодруулбал Хөгжлийн банкны зээл олгох хамгийн эцсийн шийдвэрийг ТУЗ-ийн хурлаар гаргадаг. Төлөөлөн удирдах зөвлөлийн шийдвэрийн дагуу зээлийн гэрээ байгуулагдах процесс өрнөдөг гэдэг нь маш тодорхой болсон. Хөгжлийн банкны ТУЗ-ийн гишүүд болон дарга нар зээл шийдэж өгснийхөө хариуд их хэмжээний мөнгө авсан тухай аман яриа үе ,үе дуулдаж ирсэн нь оргүй зүйл биш бололтой. ТУЗ-ийн шийдвэрийн дагуу олгосон зээлийн тал хувь нь чанаргүй ангилалд багтсан нь ингэж хардах шалтгаан мөнөөс мөн. Үүний ард ашиг сонирхол, авлига, хээл хахууль байж дээ гэсэн бодол эрхгүй төрж байгаа юм. Тиймээс Хөгжлийн банкны ТУЗ-ийн дарга, гишүүдийг шалгаж энэ эргэлзээг тайлж асуудлыг нэг талд нь гаргах хэрэгтэй байна.

ЗГХЭГ-ын харьяанд байсан Хөгжлийн банкийг Сангийн яамны харьяа болгож Ч.Хүрэлбаатарын ойрын хүн С.Наранцогт тус банкны ТУЗ-д гишүүн, даргаар ажилласан нь Хөгжлийн банк хэзээнээсээ улс төрчдийн нөлөөлөлд автаж, ашиг сонирхлын зөрчилтэй ажиллаж ирсэнг илтгээд байгаа юм.