Даваа гарагт олон улсын зах зээлд газрын тосны үнэ 7 жилийн дээд түвшиндээ хүрлээ. ОХУ, Украины хооронд үүсээд буй асуудалтай холбоотойгоор нийлүүлэлт хумигдаж магадгүй гэх зах зээлийн хүлээлт үнийн түвшин өсөхөд нөлөөлж байна.
Задлаад харвал Брент маркийн газрын тосны үнэ 1.12 ам.доллароор өсөж баррель нь $95 давжээ. Энэ нь 2014 оны 10 дугаар сараас хойших хамгийн өндөр үзүүлэлт. Вест техас маркийн газрын тос мөн адил 1.28 ам.доллароор өсөж баррель нь $94 давсан байна.
Олон улсын геополитикийн нөхцөл байдлаас үүдэж газрын тосны үнийн савлагаа өндөр байна. Нөхцөл байдал хүндэрвэл үнэ нь $100 давж ч магадгүй гэж шинжээчид анхааруулж буй.
Газрын тосны үнэ ийнхүү сүүлийн жил гаруй хугацаанд тасралтгүй өссөн нь шатахууны жижиглэнгийн үнэ өсөхөд нөлөөлж байна. Улмаар олон улсад инфляцын түвшин олон жилийн дээд үзүүлэлтдээ хүрээд буй. Тухайлбал АНУ-д инфляц төв банкны зорилтоос нь бараг 4 дахин өндөр буюу 7.5% хүрэхэд жилийн дүнгээр 50 орчим хувь өссөн шатахууны үнэ голлон нөлөөлсөн байна. Мөн инфляц нь 30 жилийн дээд түвшинд хүрээд буй Их Британид жижиглэнгийн шатахууны үнэ түүхэн дээд түвшиндээ хүрчээ.
