Английн хамгийн эртний уушийн газарт тооцогддог “Ye Olde Fighting Cocks” цар тахлын улмаас дампуурахад хүрсэн байна.
Лондон хотоос хойд зүгт Хaртфордшир гүнлэгийн Сэнт Албанс хотод оршдог энэхүү уушийн газар нь 793 онд байгуулагдаж байжээ.
Хэдийгээр олон газар энэхүү алдрыг булаацалддаг ч Гиннесийн дэлхийн дээд амжилтын ном “Ye Olde Fighting Cocks”-ийг Английн хамгийн эртний уушийн газар гэж бүртгэсэн байдаг.
1,200 гаруй жилийн түүхэндээ тус газар нь Европт дэгдсэн Хар тахал, дэлхийн хоёр дайн, иргэний дайнууд, санхүүгийн хямралуудыг давж гарсан ч Covid-19 тахлын өмнө өвдөг сөхөрчээ.
“Би болон багийнхан маань уушийн газраа нээлттэй байлгах бүх аргыг хэрэглэлээ. Гэвч сүүлийн хоёр жил зочлох үйлчилгээний салбар урьд өмнө тохиолдож байгаагүй хүнд хэцүү хямралтай тулгарсан тул цаашид үйл ажиллагаагаа явуулах аргагүй болж байна” гэж тус газрын менежэр Кристо Тофалли мэдэгдсэн байна.
Баар, уушийн газруудаараа алдартай Англид коронавирусийн цар тахлын нөлөө хүндээр туссан юм. Зөвхөн 2021 онд Британийн энэ салбар $7.7 тэрбумын алдагдал хүлээснийг “British Beer and Pub Association” байгууллага мэдээлжээ.
Дампуурлаа зарласнаас нь хойш маш олон хүн холбоо барьж буй тул эртний уушийн газар нь шинэ эзний удирдлага дор дахин үүд хаалгаа нээнэ гэдэгт найдаж байгаагаа Тофалли BBC сувагт ярьсан байна.
Эх сурвалж: Business Insider
