Нийслэлийн ерөнхий боловсролын зарим сургуулийн хичээл эхлэх цагт өөрчлөлт оруулах тухай санал, асуулгыг явуулж эхэллээ.

Монгол Улсын Засгийн газрын 2021.12.08-ны өдрийн хуралдааны тэмдэглэлээр Улаанбаатар хотын авто замын түгжрэлийг бууруулах зорилгоор түгжрэлд нөлөө бүхий бүсэд байршилтай нийслэлийн ерөнхий боловсролын зарим сургуулийн хичээл эхэлж, дуусах цагийн зохицуулалтыг эцэг эх, асран хамгаалагч , харгалзан дэмжигчийн ажлын цагтай нягт уялдуулан уян хатан байдлаар зохицуулах асуудлыг судлаж, турших арга хэмжээ авахыг Нийслэлийн Засаг даргад даалгасан.

Үүний дагуу судалгаанд үндэслэн түгжрэлд нөлөө бүхий төрийн өмчийн 23, төрийн бус өмчийн 36 нийт 59 сургуулийн хичээл эхлэх цагт өөрчлөлт оруулахаар санал боловсруулсан. /Эдгээр сургуулиас Их тойрууд байршилтай 44 сургууль, Хан-Уул дүүрэг буюу Яармагт байршилтай 15 сургууль бий/ Эдгээр 59 сургуульд нийт 85207 хүүхэд суралцаж байгаагаас 23952 буюу 28.1 хувь нь такси болон хувийн унаагаар хичээлдээ явдаг гэсэн судалгаа байна.

Дээрх 59 сургуулийг байршил, зорчих хөдөлгөөний урсгалаар бүсчлэн ойр байршилтай сургуулиудын хичээл эхлэх, тарах цагийг зөрүүлэх

Сургууль 1 - 07:45 минутад хичээл эхлэх

Сургууль 2 -08:15 минутад хичээл эхлэх

Сургууль 3 -09:00 минутад хичээл эхлэх

Дээрх зохицуулалттай уялдуулан нийслэл дэх аж ахуйн нэгж, байгууллагын ажил эхлэх, тарах цагийн уян хатан болгох

Ажил эхлэх цаг -07:00-10:00

Ажил тарах цаг -16:00-19:00

/07:00 цагт ажилдаа ирсэн бол 16:00 цагт тарж, 10:00 цаг ажилдаа ирсэн бол 19:00 цагт тарж болно. Байгууллага тус бүр цагийн бүртгэлээ уян хатан болгож, зохицуулалт хийх/

НИЙСЛЭЛИЙН ЗАРИМ ЕРӨНХИЙ БОЛОВСРОЛЫН СУРГУУЛИЙН ХИЧЭЭЛ ЭХЛЭХ ЦАГИЙН ХУВААРЬ

Жич: Хавсралтад заагдсанаас бусад ерөнхий боловсролын сургуулийн хичээл эхлэх цаг Нийслэлийн Засаг даргын 2015 оны А/105 дугаар захирамжийн дагуу 08:00 цагт байна.

Санал асуулга 2022.02.16 14:00 цагаас 2022.02.18 14:00 цаг хүртэл үргэлжилнэ.