Монгол Улсын Засгийн Газар, Азийн хөгжлийн банкны санхүүжилттэйгээр 2011-2021 оны хооронд хэрэгжсэн Эрүүл мэндийн салбарын хөгжил хөтөлбөр-4, 4+ төсөл амжилттай хэрэгжиж дуусжээ.

Улаанбаатар хотын эмнэлгийн тусламж үйлчилгээг бэхжүүлэх; эрүүл мэндийн салбарын хүний нөөцийн чадавхыг бэхжүүлэх; эмийн аюулгүй байдлыг сайжруулах гэсэн үндсэн 3 бүрэлдэхүүний хүрээнд хэрэгжсэн тус төслийн эхний бүрэлдэхүүн хэсгийн онцлон тэмдэглүүштэй нэг ажил нь Монгол улсын нийт хүн амын 10 хүн тутмын нэг нь, нийслэлийн хүн амын 3 хүн тутмын нэг нь амьдардаг, Улаанбаатар хотын хамгийн том захын дүүрэг болох Сонгинохайрхан дүүргийн 19 дүгээр хороонд дүүргийн жишиг нэгдсэн эмнэлэг баригдсан явдал юм.

Олон улсын эмнэлгийн стандартуудыг барилга, зогсоол, орц гарц, зам, төлөвлөлт, тоног төхөөрөмж, хүний нөөц гээд бүх талаараа хангасан тус эмнэлэг 2020 онд шинэчлэгдсэн “Эмнэлгийн тусламж үйлчилгээний тухай хууль”-аар үндсэн мэргэжлийн тусламж үйлчилгээг үзүүлэх болсноор СХДНЭ-ээс тус дүүргийн иргэд олон төрлийн эмнэлгийн тусламж үйлчилгээг нэг дороос авах боломж бүрдэж, түүний үр дүнд 3 дахь шатлалын гэж нэрлэгддэг байсан төрөлжсөн, тусгай мэргэжлийн төвүүд, тухайлбал, ХӨСҮТ, ХСҮТ, ГСҮТ, ЭХЭМҮТ болон Улсын 1, 2, 3 дугаар төв эмнэлгүүдийн ачаалал эрс буурч байгаа нь онцлон тэмдэглүүштэй үр дүн билээ.

Учир нь дүүргийн иргэд үндсэн мэргэжлийн тусламж үйлчилгээг авахын тулд долоогоос дээш төрлийн тусламж үйлчилгээ үзүүлдэг төр, хувийн хэвшлийн эмнэлэгт очих хэрэгтэй болдог байв. Жишээ нь, хавдрын тусламж үйлчилгээ авахын тулд ХСҮТ руу, гэмтэж бэртвэл ГСҮТ рүү, мэс засал хийлгэх шаардлагатай бол улсын 3 дугаар төв эмнэлэг рүү гэх мэтээр үргэлжилнэ.

Дүүргийн эмнэлгүүд ерөнхий мэс засал, гэмтэл, эх барих эмэгтэйчүүд, төрөх гэх мэт тусламж үйлчилгээ үзүүлэх тоног төхөөрөмж, техник хэрэгсэл, хүний нөөцийн хүчин чадалгүйн улмаас 3 дахь шатлалын эмнэлгүүд олгой, цөсний хагалгаа гэх мэт үндсэн мэргэжлийн тусламж үйлчилгээнд ихэнх нөөц, хүчин чадал, цаг хугацаагаа зарцуулах шаардлагатай болдог. Дээр нь ачаалал, дараалал ихтэйгээс болж тусламж үйлчилгээний чанар, хүртээмжид үйлчлүүлэгч бүрэн дүүрэн сэтгэл хангалуун байж чаддаггүй. Зүй нь шатлалынхаа дагуу төрөлжсөн, тусгай мэргэжил шаардах эрдэм шинжилгээ, судалгаа шинжилгээ, эмнэлзүйн туршилт хийх, шинэ арга барил, техник технологийг судлах, турших, нэвтрүүлэх, хүний нөөцөө чадавхжуулах, зүрх, тархи, мэдрэл гэх мэт нарийн ур чадвар, мэдлэг, туршлага шаардсан мэс заслуудыг хийж, энэ бүгдийн үр дүнд эмч, эмнэлгийн ажилтнууд, эмнэлэг, эрүүл мэндийн салбар нь хөгжиж байх учиртай юм.

Энэ боломжийг бий болгохын тулд ЭМСХХ-4 төслийн хүрээнд барьсан жилд нийт 150.000 хүнд үйлчлэх хүчин чадалтай СХД-ийн жишиг нэгдсэн эмнэлгийн давуу талуудыг дараах видеоноос үзээрэй.