Хөгжлийн банкнаас 2022 оны нэгдүгээр сарын 20-ны өдөр чанаргүй зээлдэгчдийн мэдээллийг олон нийтэд дэлгэсэн. Дээрх мэдээллийн мөрөөр Авлигатай тэмцэх газар болон хууль хяналтын байгууллагаас зээлийн эргэн төлөлтөө төлөөгүй болон зээлээ зориулалтын бусаар ашигласан зээлдэгчдийг шалгаж эхэлсэн юм. Улмаар тус банкны захирал байхдаа зээл олгосон захирлуудыг цагдан хорих санал прокуророос Баянзүрх, Чингэлтэй, Сүхбаатар дүүргийн шүүхэд ирсэн талаар бид өмнө нь мэдээлсэн. Мөн АТГ Хөгжлийн банкны зарим зээлдэгчийг цагдан хорих саналыг прокурорт хүргүүлсэн аж.
УЕПГ-аас УИХ-ын гурван гишүүний бүрэн эрхийг түдгэлзүүлэх санал гаргасан гэх мэдээлэл цацагдсан. Үүнд АТГ-аас нэгдсэн журмаар тайлбар өглөө. АТГ "Хөгжлийн банкнаас зээл авсан, олгосон гэх бүх мэдээллийг шалгаж тогтооно. УИХ-ын гишүүн, сайд эсэх нь хамаагүй. Зарим нэр бүхий УИХ-ын гишүүдэд хэрэг үүсгэн шалгаж эхэлсэн. Улс төрд нөлөө бүхий этгээдүүдийн эрх мэдэл, албан тушаал, эрх нөлөөгөө ашиглан зээл авсан эсэх, хамаарал бүхий этгээддээ давуу байдал олгосон, олгуулсан эсэх зэрэг бүх үйлдлийг АТГ шалгана" гэжээ.
