Өчигдөр буюу Мягмар гарагт ОХУ-ын парламентын дээд танхим зэвсэгт хүчнээ гадаад орнуудад илгээх бүрэн эрхийг ерөнхийлөгч Владимир Путинд олгох тогтоолыг баталжээ.
Ингэснээр Путин өөрийн улсын зэвсэгт хүчнийг “олон улсын хууль дүрэм, хэм хэмжээний хүрээнд” гадаад орнуудад илгээх эрх мэдэлтэй болж байгааг тогтоолд өгүүлсэн байна.
Гэхдээ уг тогтоолд цэргийн тоо, үйл ажиллагааны хүрээ, зорилго, гадаадад байх хугацаа зэргийг огт дурдаагүй ба ерөнхийлөгч үндсэн хуульд заасны дагуу өөрөө шийдвэрлэхээр тусгажээ.
Одоогоор ОХУ-ын цэрэг Украинаас салан тусгаарласан Донецк, Луганск мужуудад энхийг сахиулах үүрэгтэйгээр нэвтрээд байгаа.
Өчигдөр сэтгүүлчидтэй уулзахдаа Путин дээрх мужуудад шаардлагатай бол цэрэг, зэвсгийн тусламж үзүүлэх боломжтойг хэлжээ.
“Өчигдөр бид БНДАУ (Бүгд Найрамдах Донецк Ард Улс), БНЛАУ (Бүгд Найрамдах Луганск Ард Улс) -тай гэрээ байгуулсан. Уг гэрээнд цэрэг, зэвсгийн тусламж үзүүлэх заалт байгаа. Хэрвээ шаардлагатай бол бид амлалтаа биелүүлнэ” гэж Путин хэлсэн юм.
Даваа гарагт дээрх мужуудын тусгаар тогтнолыг хүлээн зөвшөөрсний дараа Путин шинээр байгуулагдсан улсуудтай хамтын ажиллагааны гэрээ байгуулж байв.
Гэрээг өчигдөр ОХУ-ын парламентын хоёр танхим болон Донецк, Луганскийн хууль тогтоох дээд байгууллагууд баталсан байна.
2014 онд Украинд гарсан Майданы хувьсгалын дараа Донбассын бүс нутаг дахь орос хэлтэй хүн ам голлон суудаг Донецк, Луганск мужууд салан тусгаарлаж, бие дааж буйгаа зарласан юм.
Өнгөрсөн жилүүдэд Украины засгийн газрын арми, салан тусгаарлагчдын хооронд цус асгаруулсан дайн үргэлжилж байна.
Эх сурвалж: Russia Today
