Хятад улс 9.6 сая км2 нутаг дэвсгэртэй дэлхийн 3-р том орон бөгөөд зүүн талаараа Номхон далайд тулж бусад талаараа Вьетнам, Лаос, Бирм, Бутан, Энэтхэг, Балба, Пакистан, Афган, Тажик, Хиргис, Хасаг, Монгол, Орос, Умар Солонгос гэсэн 14 улстай хиллэдэг.Өдгөө дэлхийн бар гэгдэх тус улс ядууралтай хийх тэмцэлд ихээхэн хүчин чармайлт гаргах нь зайлшгүй тухай мэдэгджээ. Энэ талаар ХКН-ын Төв Хорооны Улстөрийн товчооны хурлаар хэлэлцэгдсэнийг тус улсын хэвлэл мэдээллийн хэрэгслүүд нийтэлсэн байна.
Өнгөрөгч баасан гаригт хуралдсан Улстөрийн товчооны хурлыг намын удирдагч Си Зиньпин даргалан, БНХАУ дахь ядуурлыг бууруулах талаар хэлэлцсэн аж. Хятад орон дахь үгээгүй ядуусын тоог бууруулах чиглэлээр сүүлийн таван жилд хийгдсэн ажлууд тодорхой үр дүнд хүрсэн бөгөөд ирэх гурван жилийн хугацаанд энэхүү эмзэг давхаргыг алга болгох ёстой хэмээн хуралдаанд оролцогчид санал нэгтэй дэмжжээ.
Ийнхүү 2020 он гэхэд, БНХАУ хэт ядуусгүй болох зорилт тавьсан байна. 2012 онд тус улс дахь хэт ядуусын тоо 98,9 сая байсан бол 2017 оны сүүлчийн байдлаар 30,4 сая болж хорогдсон байна.
Хятад улсад ядууралтай тэмцэх зорилгоор 86 тэрбум юань /13,6 тэрбум доллар/-ийг зарцуулахаар төлөвлөөд байгаа бөгөөд түүнийг дэд бүтцийн бүтээн байгуулалт болон ард түмний боловсролыг дэмжихэд голлон зарцуулах аж.
Эх сурвалж Шуурхай.мн