Бага насны хүүхдийг хүчирхийлсэн, амь насыг нь хөнөөсөн тохиолдолд гэмт хэрэгтэнд цаазын ял оноох нэмэлтийг Эрүүгийн хуульд оруулах ёстой гэж Ерөнхийлөгч Х.Баттулга үзэж байна. Төрийн тэргүүн энэ саналаа Хууль зүй, дотоод хэргийн яаманд хүргүүлсэн ч дөрвөн сарын турш ямар нэг хариу ирээгүй тул өөрийн бүрэн эрхийн хүрээнд Эрүүгийн хуульд дээрх өөрчлөлтийг тусгах хуулийн төсөл боловсруулахаар боллоо. Энэ өөрчлөлт нь хүүхдийг хүчирхийлэх гэмт хэрэгт оноох ялыг чангатгаж, энэ төрлийн гэмт хэрэгт цаазаар авах ялыг оноох тухай нэмэлт өөрчлөлт болох юм.

Тэгвэл Ерөнхийлөгчийн Тамгын газраас дээрх асуудлаар мэдээлэл хийлээ.

Ерөнхийлөгчийн зөвлөх Г.Уянга "Өнгөрсөн онд 2-7 насны 298 хүүхэд бэлгийн хүчирхийлэлд өртсөн тухай сэтгэл сэрдийлгэм мэдээ нийгмийг цочроож байна.  Үүнд ой 4 сартай, ой 8 сартай гэх мэтчилэн аймшигт хэрэг дурдагдсаар байгаа билээ. Ийм учраас төрөөс зайлшгүй арга хэмжээ авахыг шаардаж байна.

"Монгол Улсын Ерөнхийлөгч 2017 онд арваннэгдүгээр сард  Хууль зүй, дотоод хэргийн яаманд хүсэлт гаргасан. Бага насны хүүхдийг хүчирхийлсэн хэрэгт цаазын ял оноох, эсвэл хөнгөлөх хууль санаачлах эрхийнхээ хүрээнд асуудлыг судалж УИХ-д оруулах үүрэг чиглэл өгсөн боловч одоо болтол хариу өгөөгүй байна.

Өнгөрсөн долоо хоногт ХЗДХЯ-наас цаазын ялыг сэргээх боломжгүй гэсэн дүгнэлт гаргасан тухай хэвлэлээс олж мэдлээ. Үүнээс харахад цаазын ялыг сэргээх боломжгүй гэсэн дүгнэлтийг гаргасан байна. Монгол Улс 2010 оноос өмнө Эрүүгийн хуульд цаазаар авах ялын төрөл зүйлийг зургаан төрлийн гэмт хэрэгт хэрэглэдэг байсан. 2010 онд Ерөнхийлөгч асан Ц.Элбэгдорж Их хурлын чуулганаар цаазаар авах ялыг гүйцэтгэхүй гэдэг мэдэгдлийг хийсэн.

Монгол Улсын Үндсэн хуулийг зөрчсөн бол олон улсын конвенцид нэгдэн орохгүй. Тиймээс цаазын ялыг сэргээх шаардлага үүсч байна гэж үзэж байна. Тиймээс Эрүүгийн хуульд  бага насны хүүхдийг хүчирхийлсэн хэрэгт цаазын ял оноох саналыг Ерөнхийлөгч гаргаж, Эрүүгийн хуульд нэмэлт, өөрчлөлт оруулах төслийг боловсруулж, өнөөдрөөс олон нийтийн санал асуулга явуулж эхэлж байна.

Эрүүгийн хуульд цаазаар авах ялыг бага насны хүүхдийг хүчиндсэн, амь насыг нь хөнөөсөн хэрэгт  оноохоор төсөлд нэмэлт, өөрчлөлт оруулж байна. Шинээр батлагдсан хуулийн тухай хуулиар  шинээр батлуулах гэж  буй хуулийн төслүүдэд олон нийтийн саналыг авна гэж тусгасан. Үүний дагуу санал хураалт сарын хугацаанд үргэлжилнэ.

Монгол Улс цаазаар авах ялыг хоёр ч удаа халж, харамсалтай нь буцааж хэрэглэхээс өөр аргагүй нөхцөл байдалд орж байсан юм билээ.Ерөнхийлөгч тодорхой гэмт хэргүүд дээр энэ ялыг хэрэглэх гэж байгаа. Тийм учраас улс төрийн хэрэгтэнд хамаарахгүй" гэв.

Хуулийн зөвлөх Р.Булгамаа  "Бага насны буюу насанд хүрээгүй хүүхдийг  хүчиндэх, амь насыг нь хороох гэмт хэрэг сүүлийн жилүүдэд нэмэгдэж байгаагаас гадна энэ хэрэг нь улам харгис хэрцгий болж байна. Ээжийнхээ мөөмнөөс ч гараагүй, хөл дээрээ зогсож чадахгүй, бяцхан үрсийг хүчиндэж, амь насыг нь хороох үйлдлийг бид хараад байж хэрхэвч болохгүй.

Хэдийгээр цаазаар авах ял хүмүүнлэг бус шинжтэй  хэдий ч бид бяцхан үрсийнхээ амь нас, эрүүл мэнд, амьд явах эрхэд хүндэтгэлтэй хандах ёстой. Тиймээс энэ төрлийн гэмт хэргийн хариуцлагыг чангатгахын тулд  бүх насаар нь хорих хүртэлх арга хэмжээг төсөлд оруулж байна. Олон нийт болон нийгмийн зүгээс хууль эрхүшйн хувьд  хүлээлттэй байгаа асуудал бол бага насны хүүхдийг хүчиндэх асуудал. Хуучин Эрүүгийн хуульд цаазаар авах ял долоон гэмт хэрэгт хамаарагдаж байсан. Эдгээрээс зөвхөн нэг төрлөөр буюу Монгол хүний зан заншилд нийцэмгүй аймшигт хэргүүд гарч байгаа учраас энэ үйлдэлд нь бид хуулзүйн харицлагыг чангатгах нь зүйтэй гэж үзэж байна" гэлээ.

                                                                                                     Эх сурвалж Шуурхай.мн