-Путин гадаадын хөрөнгө оруулагчдыг Оросын хөрөнгөөс гаргахыг хязгаарлаж магадгүй байна-
ОХУ-ын засгийн газар гадаадын бизнесменүүдийг Оросоос хөрөнгөө гаргахыг түр хугацаагаар хязгаарлах тухай Ерөнхийлөгчийн зарлигийн төслийг бэлтгэжээ.
"Одоогийн хориг арга хэмжээний нөхцөлд гадаадын бизнес эрхлэгчид эдийн засгийн хүчин зүйлд хөтлөгдөхгүй, харин улс төрийн шахалтаар шийдвэр гаргахаас өөр аргагүйд хүрч байна" гэж ОХУ-ын Ерөнхий сайд Михаил Мишустин хориг арга хэмжээний үеэр эдийн засгаа дэмжих асуудлаар хийсэн уулзалтын үеэр мэдэгдэв.
Ерөнхий сайдын хэлснээр Орос улс гадаадын бизнесийг боломжит түншүүд гэж үзсээр байгаа бөгөөд бүтээлч сэтгэлгээтэй хөрөнгө оруулагчидтай яриа хэлэлцээ хийхэд нээлттэй байна гэжээ.
Гадаадын олон компаниуд Оросын зах зээлд удаан хугацаанд амжилттай ажиллаж, өндөр цалинтай ажлын байр бий болгож, төслүүдээ бүрэн хүчин чадлаараа ажиллуулж, нийлүүлэлтийн сүлжээг бий болгож байгааг Засгийн газрын тэргүүн тэмдэглэв.
"Манай улсад хөрөнгө оруулсан хүмүүс цаашид ажиллах боломжтой гэж найдаж байна. Хориг арга хэмжээний дарамт эцэстээ намжиж, гадаадын улстөрчдийн уриа лоозонд автан манай улсад хэрэгжүүлж буй төслүүдээ хумихгүй байх гэдэгт итгэлтэй байна. Зах зээлээс гарах амархан, харин өрсөлдөгчид шигүү суурьшсан газар буцаж ирэх нь илүү хэцүү" гэж Мишустин тайлбарлав.
Оросыг орхиж буй томоохон хөрөнгө оруулагчид
Сүүлийн өдрүүдэд гадаадын хэд хэдэн томоохон компани Оросын аж ахуйн нэгжүүдэд хувьцаагаа худалдах эсвэл Украинд Орос түрэмгийлсэний улмаас шинэ төслүүдээ царцаах болсноо зарлалаа.
Роснефть компанийн 19.75 хувийг эзэмшдэг Британийн ВР компанийн захирлуудын зөвлөл хоёрдугаар сарын 27-нд Роснефть компанийн хувьцаа эзэмшигчээс гарна гэж мэдэгднд байна. Роснефть хариуд нь "ВР зохицуулагч тал болон түүний хувьцаа эзэмшигчдийн зүгээс урьд өмнө байгаагүй дарамтад орсон" гэж мэдэгджээ.
Хоёрдугаар сарын 28-нд Англи-Голландын Shell компани Газпромтой хамтарсан үйлдвэрээс гарч, "Хойд урсгал-2" хийн хоолойн төсөлд оролцохоо зогсоох шийдвэрээ зарлав.
Өөр нэг нефтийн компани болох Норвегийн Equinor ч мөн Орост байгуулсан хамтарсан үйлдвэрээсээ гарч, тус улсад хийх аливаа хөрөнгө оруулалтыг зогсоох шийдвэр гаргажээ.
Францын TotalEnergies компани (NOVATEK-ийн 19.4 хувийг эзэмшдэг) Орост шинэ төслүүдэд хөрөнгө оруулахаа зогсооно гэж мягмар гарагт мэдэгдэв.
Apple Орос дахь бүх бүтээгдэхүүндээ нэвтрэх эрхийг хязгаарлах бөгөөд Apple Pay үйлчилгээ нь "хязгаарлагдмал" хандалтаар ажиллах болно гэж мэдэгдэв (энэ хязгаарлалт нь яг юу гэсэн үг болохыг тус компани тайлбарлаагүй).
Сахалин-2 төслийн хамтран эзэмшигч Америкийн нефтийн ExxonMobil компани Сахалин дахь бүх ажлыг нэг сарын хугацаанд зогсоосон тухай бүс нутгийн Sakhalin.info хэвлэл мэдээлэв.
Эх сурвалж:ВВС
