Улс орноо Оросын эзлэн түрэмгийллээс хамгаалахын төлөө тэмцэж байгаа Украины ерөнхийлөгч Володимир Зеленский өнөөдөр дэлхий нийтийн анхаарлын төвд байна.
2019 онд Украины ерөнхийлөгчөөр сонгогдохоосоо өмнө тэрбээр хошин урлагийн жүжигчин, телевизийн од байсан юм.
Ингээд түүний амьдрал, урлагийн замналын талаар сонирхолтой баримтуудыг танилцуулж байна.
Хуульчийн мэргэжлээр суралцсан Зеленский урлагийн замд орсон
Тэрбээр 2000 онд Киевийн Эдийн Засгийн Үндэсний Их Сургуулийг хуульчийн мэргэжлээр төгсжээ. Гэхдээ суралцах хугацаандаа Зеленский урлагийн мөр хөөх болсон байна. 1997 оноос түүний Квартал 95 нэртэй хамтлаг телевизийн КВН хошин урлагийн шоунд тогтмол оролцох болжээ.
Тэрбээр өөрийн байгуулалцсан Квартал 95 студийн хэд хэдэн кинонд дүр бүтээж, зохиолыг нь бичиж байв
2005 онд Зеленский дэлгэцийн анхны уран бүтээлээ туурвиж, “Шадар гурван цэрэг” мюзикл киноны зохиолыг бичиж байжээ. Тэрбээр энэ кинондоо Артаняны дүрийг бүтээсэн юм.
Дараа нь тэр өөр хэд хэдэн киноны зохиолыг бичиж, дүр бүтээж байжээ.
2006 онд тэр Украины “Ододтой бүжиглэе” шоунд түрүүлж байжээ
Зеленский 2006 онд Украины “Ододтой бүжиглэе” телевизийн шоунд оролцож, хамтрагч Олена Шоптенкогийн хамт тэргүүн байрыг эзэлж байв.
Зеленский “Paddington” хүүхдийн киноны Украинд гаргасан хувилбарт дуу оруулж байжээ
Украинд гаргасан “Paddington” хүүхдийн киноны баавгайн дүрд Зеленский дуу оруулагчаар ажиллаж байсныг StudioCana студи баталжээ.
Зеленский Украинд алдартай “Ард түмний зарц” телевизийн цувралд ерөнхийлөгчийн дүр бүтээж байв
2015-2019 оны хооронд Украины телевизээр цацагдсан “Ард түмний зарц” шоунд Зеленский жирийн багшаас улсын ерөнхийлөгч болсон хүний дүрийг бүтээж байжээ.
Тэрбээр бодит амьдрал дээр ч бас амжилт гаргаж, 2019 оны сонгуульд 70 гаруй хувийн саналаар Украины ерөнхийлөгч болсон юм.
Зеленский жүүд хүн
2020 оны нэгдүгээр сард Израилд болсон Аусшвицийн хорих лагерийг чөлөөлсний 75 жилийн ойн арга хэмжээнд оролцохдоо Зеленский жүүд гэр бүлийнхээ туулсан амьдралын талаар ярьж байжээ.
Түүний өвөө Холокостоос амьд гарч, гурван ах нь амь үрэгдэж байсан гэнэ.
Кино зохиолч гэргийтэй Зеленский хоёр хүүхэдтэй
Зеленский гэргий Оленатайгаа их сургуульд суралцаж байхдаа танилцжээ. Олена тухайн үед архитекторын мэргэжлээр суралцаж байсан ч сүүлд ангиа сольж, Зеленскийн студид кино зохиолчоор ажиллах болсон байна.
Тэд хоёр хүүхэдтэй ба охин Александра нь 17 настай, хүү Кирил нь 9 настай юм.
Эх сурвалж: Business Insider
