АНКАРА. /CNN/. Турк улс яриа хэлэлцээний суваг хэвээр байхын тулд ОХУ-д хориг арга хэмжээ авахаар төлөвлөөгүй байна гэж тус улсын Ерөнхийлөгчийн албан ёсны төлөөлөгч Ибрагим Калын мэдэгджээ.
"Бид улс орныхоо тэргүүлэх чиглэлийг харгалзаж ажиллах ёстой. ОХУ-тай хэлэлцээ хийх чадвартай тал байх ёстой. Бүх гүүрийг шатаачихаар Оростой хэн ярих вэ? Бид энэ сувгийг нээлттэй байлгахын тулд хориг арга хэмжээ авахаар төлөвлөөгүй" гэж тэрбээр “CNN Turk” сувагт ярилцлага өгөхдөө цохон тэмдэглэсэн байна.
Калын мөн Туркийн эрх баригчид улс орноо "хохироох арга хэмжээ авах бодолгүй байна" гэж нэмж хэлсэн байна. "Бид аялал жуулчлал, байгалийн хий, хөдөө аж ахуй зэрэг чиглэлээр Оростой худалдааны нягт харилцаатай байдаг" гэж тэрбээр тайлбарлав.
Үүнээс гадна Эрдоганы төлөөлөгчийн хэлснээр, "Хар тэнгист энх тайван, тогтвортой байдлыг хадгалахад Монтрёгийн Конвенц чухал үүрэг гүйцэтгэжээ". "Бид Монтрёгийн Конвенцыг хурцадмал байдлыг улам хурцатгахгүй байх үүднээс хэрэгжүүлж байгаа. Бид энэ сэдвээр талуудтай зөвлөлдөж байна, бид үүнийг бүгдэд нь уламжилсан. Өнөөдрийг хүртэл Дарданелл болон Босфорын хоолойгоор байлдааны хөлөг онгоц нэвтрүүлэх хүсэлт ирээгүй" гэж тэрбээр хэлсэн байна.
Д.Жаргал
Эх сурвалж: Монцамэ агентлаг
