Путиний үнэнч холбоотон гэгддэг Чечений засаг захиргааны тэргүүн Рамзан Кадыров саяхан Телеграм сүлжээнд нийтэлсэн мэдэгдэлдээ Украины дайнд илүү хатуу, харгис тактик хэрэглэхийг Оросын эрх баригчдад уриалжээ.
Уг мэдэгдэлдээ тэр Украинд илгээсэн Чечений дайчдаас хоёр хүн алагдаж, зургаан хүн шархадсан тухай дурдсан байна.
Гэхдээ Украины эх сурвалжууд Кадыровын цэргийн хохирлыг өөрөөр мэдээлж байгаа.
Тухайлбал Киев Индепендент сайтад Чечений цэргийн цуваа бүхэлдээ устгагдсан гэж мэдээлжээ.
Нидерландад төвлөрдөг эрэн сурвалжлах сэтгүүлчдийн Bellingcat багийн тэргүүн Кристо Грозев твиттер хуудсандаа саяхан дроны цохилтод өртөж, сүйрсэн Чечений цэргийн цувааны гэх дүрс бичлэгийг нийтэлсэн байна.
I've been receiving messages from Chechen sources that after huge losses of Kadyrov's personal "army" (in particular: @ 70 of them were reported charred alive after a single Bayraktar strike), most of the rest returned across the border. Scenes like this corroborate such reports. https://t.co/hPLPEz8V9g
— Christo Grozev (@christogrozev) February 27, 2022
Кадыров мэдэгдэлдээ “Илүү зүйл нуршилгүйгээр хэлэхэд шинэ тактик хэрэгжүүлэх хэрэгтэй гэж би бодож байна” гэсэн нь Путинд хаягласан үг бололтой.
Тэрбээр цааш нь бичихдээ “Нацистууд, террористуудыг устгаж, хотуудыг чөлөөлөхөд илүү өргөн хүрээнд ажиллагаа явуулах шаардлагатай” гэжээ.
Украинд явуулж буй ажиллагаа нь удааширсанд Путин сэтгэл дундуур байгаа тухай АНУ-ын тагнуулын эх сурвалжтай мэдээллийг Мягмар гарагт NBC News суваг дамжуулсан байна.
Мөн Даваа гарагт Их Британийн батлан хамгаалах яамнаас гаргасан дүгнэлтэд “Ложистикийн бүтэлгүйтэл, Украины талын ширүүн эсэргүүцэл Оросын довтолгоонд саад учруулж байна” гэж бичжээ.
Гэхдээ Путин уг алдаагаа засахын тулд Украинд илүү хатуу харгис байлдааны ажиллагаа эхлүүлж болзошгүй гэсэн айдас ажиглагчдын дунд үүсээд байна.
Эх сурвалж: Business Insider
