Ерөнхий сайд асан Ч.Сайханбилэгийг АТГ-аас Оюутолгойн хөрөнгө оруулалтын гэрээтэй холбогдуулж шалгахаа мэдэгдсэн. Тодруулбал, "Монгол Улсын Ерөнхий сайдаар ажиллаж байсан Ч.Сайханбилэг гадаадад байгаа. Прокурорын газраас түүнд дуудах хуудас илгээсэн. Түүнийг Монгол Улсад ирсэн үед нь Дубайн гэрээтэй холбогдуулан байцаалт авна" гэж АТГ-аас мэдээлсэн юм.
Тэгвэл АНУ-ын Денверт байгаа Ч.Сайханбилэгийг эх орондоо ирэхгүй бол албадан авчрах арга хэмжээ авна гэж эх сурвалж мэдээлсэн юм.
Харин Ерөнхий сайд асан Ч.Сайханбилэг АНУ-аас Улсын Ерөнхий прокурор М.Энх-Амгалан, АТГ-ын дарга Х.Энхжаргал нарт захидал илгээжээ.
Тэрбээр захидалдаа "Миний бие Ч.Сайханбилэгийг Оюутолгойн гэрээтэй холбоотой асуудлаар УЕПГ, АТГ-аас ирж мэдүүлэг өгөх албан бичиг ирүүлсэн. АНУ-д амьдарч байгаа дүү маань хорт хавдар өвчнөөр оношлогдон хүнд хагалгаа, эмчилгээ хийлгэх шаардлагатай болсоныг уламжлан заасан хугацаанд өөрийн биеэр хараахан очих боломжгүйгээ урд нь албан ёсоор илэрхийлсэн болно.
Гэвч сүүлийн өдрүүдэд олон нийтийн сүлжээгээр намайг оргон зайлсан, эрж хайх ажиллагаа явуулах шаардлагатай мэтээр буруу ташаа мэдээлэл гарч байгаа тул энэхүү ил захидлыг явуулж байна.
Ерөнхий сайдын хувьд хямралын үед эдийн засгаа дампуурахаас сэргийлэх гэж, үргэсэн гадны хөрөнгө оруулалтыг эргэн дуудах гэж, өнөөдрийн эдийн засгийн энэ өсөлтийг хангах гэж гацаанд орчихсон Оюутолгой төслийг хөдөлгөх боломжийг олгосон. Үүнийхээ төлөө надад хууль зөрчсөн үйлдэл байхгүй, бусдаас авсан авлига байхгүй, бусдад олгосон давуу эрх байхгүй ээ.
Би Монголдоо очно. Эмчлүүлж байгаа дүүгээ орхиод очно. Ирэх долоо хоногтоо очно. Надад хуулийн эрж хайх, таслан сэргийлэх арга хэмжээ авах үндэслэлүүд болох оргон зайлахыг завдсан, оргон зайлсан, бусдыг дарамталсан, хүндэтгэн үзэх шалтгаангүйгээр ирээгүй гэдэг ямар нэг зүйл байхгүй. Цаашид ч гарахгүй гэдгийг хариуцлагатайгаар мэдэгдэж байна. Би хууль хяналтын байгууллагын үйл ажиллагааг дурдсан хугацаанд очиж мэдүүлгээ өгч байх болно" гэжээ.
