Оросын цэргийн хяналтад байгаа Украины өмнөд бүсийн Херсон муж дахь гол гүүрэнд пуужингийн цохилт өгснөө Киевийн засгийн газар өчигдөр мэдээлжээ.
Днепр мөрний Антоновский гүүр нь Херсон дахь Оросын цэргийн хангамжийн гол зам болдог юм.
“HIMARS пуужингийн системээр эзлэн түрэмгийлэгчдийн хангамжийн гол зам болдог хоёр гүүрний нэгэнд хүчтэй цохилт өглөө. Энэ удаа Антоновский гүүр тэсэхгүй гэдэгт найдаж байна” гэж Украины ерөнхийлөгчийн зөвлөх Антон Геращенко мэдээлжээ.
Херсон мужийн Оросоос томилогдсон дэд захирагч Кирилл Стремоусов өчигдөр өглөө Оросын телевизээр ярихдаа гүүр цохилтод өртсөн ч бүрэн нураагүйг мэдээлсэн байна.
“Гүүрний хөдөлгөөн зогссон байгааг та бүхэн харж байна. Өнгөрсөн шөнө гүүр HIMARS-ийн цохилтод өртсөн” гэж тэр гүүрний дэргэдээс ярьжээ.
Оросын батлан хамгаалах чиглэлээр бичдэг блог “Военный Осведомитель” мэдээндээ “Украины зэвсэгт хүчний дараалсан цохилт Антоновский гүүрийг ашиглалтаас түр гаргасан тул хөвдөг гүүр угсрах/ гаталга онгоц ашиглахаас өөр аргагүй болж байна. Үүнд хоёр асуудал бий. Нэгдүгээрт, цаашдаа гүүрэнд өгсөн цохилт бүр өмнөхөөсөө илүү их хохирол учруулах хортой. Хоёрт, хөвөгч гүүр/ гаталга онгоц зэрэг нь дайсны цохилтод илүү өртөмхий байдаг. Баруун эрэг дэх Оросын зэвсэгт хүчний ангиудын хангамжийг таслах Украины талын оролдлогын эсрэг авах хариу арга хэмжээ тодорхойгүй боллоо гэж дүгнэхээр байна” гэж тайлбарласан байна.
Гуравдугаар сарын эхээр Оросын цэрэгт эзлэгдсэн Херсон мужийг чөлөөлөх ажиллагаанд Украины арми бэлдэж байгаа.
Тэд эхний ээлжид АНУ-аас илгээсэн HIMARS пуужингийн системээр Оросын цэргийн командын төв, зэвсгийн агуулах, хангамжийн дэд бүтцийг устгах зорилт тавьж буй бололтой.
HIMARS нь 80 км хүртэл алсын зайд GPS залууртай пуужингаар өндөр нарийвчлалтай цохилт өгөх чадвартай зэвсэг юм.
Өчигдөр бас Антоновский гүүрэнд цохилтод өртсөнтэй зэрэгцэн Оросын тал Украины өмнөд фронт дээр амжилттай давшсан тухай мэдээ ирж байна. Тухайлбал Оросын Вагнер хувийн компанийн хөлсний цэргүүд Вуглегирська цахилгаан станц болон түүний ойролцоох Новолуганське тосгоныг эзэлж, Украины хүчийг ухраасан байна.
Эх сурвалж: The Guardian
