Баасан гарагт Өмнөд Солонгосын засгийн газар төрийн албан хаагчийнхаа тоог 30,000-аар танах төлөвлөгөөг танилцуулжээ.
Тус улс сүүлийн 14 жилийнхээ түүхэнд анх удаа төрийн албадын хүн хүчийг цомхотгож байгаа нь энэ юм байна.
Цомхотголд төрийн 350 байгууллага хамрагдахыг Баасан гарагт Эдийн Засаг, Сангийн яамнаас танилцуулсан “Шинэ засгийн газрын төрийн байгууллагуудыг шинэчлэх үндсэн чиглэл” баримт бичигт дурджээ.
Энэ оны хоёрдугаар хагаст төрийн бүх байгууллага төсвийн зардлаа хамгийн багаар тооцоход 10 хувиар хэмнэх үүргийг уг бичиг баримтад тусгасан байна.
Төрийн 350 байгууллага, тэдгээрийн дотор төрийн өмчит 36 компани зардал хэмнэх төлөвлөгөөгөө наймдугаар сард багтаан засгийн газарт ирүүлэхээр болжээ.
“Төрийн байгууллагуудын үр ашиггүй, оновчгүй менежмэнтийг засгийн газар цаашид тэвчихгүй” гэж Эдийн Засаг, Сангийн яамны дэд сайд Чу Кюн Хо төлөвлөгөөг танилцуулах хурлын үеэр хэлсэн байна.
Эдийн засгийн хүндрэлийн үед “бүсээ чангалах” бэлтгэлтэй байхыг тэр төрийн байгууллагуудын удирдлагуудад сануулжээ.
Одоогоор тус улсын төрийн албан хаагчийн тоо 448,000 байгаа гэнэ.
Төрийн байгууллага тус бүрийн удирдах албан тушаалтны тоо нь нийт ажилтнуудын 30 хувиас хэтэрч болохгүйг төлөвлөгөөнд заасан байна.
Түрээсийн зардлыг бууруулах зорилгоор өндөр албан тушаалтнуудын өрөөний хэмжээг хүртэл хязгаарлахаар төлөвлөжээ. Тухайлбал төрийн өмчит компаниудын гүйцэтгэх захирлуудын өрөөний хэмжээ 99 метр квадрат, бусад захирлуудын өрөө 50 метр квадратаас хэтэрч болохгүйг заасан байна.
Эх сурвалж: Korea Times