Өнгөрсөн долоо хоногт Саудын Араб улсын угсаа залгамжлах хунтайж Мухаммед Бин Салман нэн орчин үеийн хот байгуулах төслийнхөө зураглалыг нийтэд танилцуулсан юм.
Тус улсын баруун хойд хэсэгт, Улаан тэнгисийн эрэгт байгуулагдах шинэ хотыг Neom гэж нэрлэж байгаа. Сонирхолтой нь уг хот элсэн цөл дундуур 170 км урт үргэлжилж, 200 метрийн өргөнтэй байх юм.
Далайн түвшнээс дээш 500 метр өндөрт байгуулагдах 34 км.кв талбайтай энэхүү “урт хот”-д 9 сая хүн амьдрах гэнэ.
Нэг үгээр хэлбэл Neom хот нь асар урт ганц ширхэг хэвтээ цамхаг байх юм.
Хот бүхэлдээ сэргээгдэх эрчим хүчээр тэжээгдэж, хиймэл оюуны системээр удирдагдах гэнэ.
Ямар ч замгүй, автомашингүй, хүлэмжийн хийн ялгаралгүй энэ хотын нэг үзүүрээс нөгөө үзүүр хүртэл өндөр хурдны төмөр замаар л зорчих боломжтой байх ажээ.
Гэхдээ уран зөгнөлийн гэмээр ийм хотыг байгуулах технологийн боломж бий эсэх нь зарим мэргэжилтнүүдийг эргэлзүүлж байна.
Газрын тосоор баян Саудын Араб улс эдийн засгаа солонгоруулах зорилгын хүрээнд Vision 2030 нэртэй хөгжлийн төсөл хэрэгжүүлж байгаа.
Neom хотыг бүтээн босгох The Line төсөл нь энэхүү төлөвлөгөөний нэг хэсэг юм. Тус улс ирээдүйд аялал жуулчлалд тулгуурласан эдийн засагтай болохыг зорьж, бүс нутгийн Дубай, Абу Даби зэрэг алдартай хотуудаас хөгжлөөрөө түрүүлэхийг хичээж байна.
Тухайлбал 2030 он гэхэд жил бүр 100 сая жуулчин хүлээж авдаг болохоор төлөвлөжээ.
Мөн Саудын Арабын эрх баригчид шашны хэт хуучинсаг нийгэм, хүний эрхийг бүдүүлгээр зөрчдөг гэсэн дүр төрхөөсөө салахыг хичээж байгаа юм.
“Энэхүү зураг төсөл нь уламжлалт амьдрах орчин, хот байгуулалтын талаар ойлголтыг эвдэж, байгаль хүнд хамгийн ээлтэй загварыг бүтээх зорилготой юм. The Line төсөл нь өнөөдрийн хотын амьдралд тулгарч байгаа асуудлуудыг шийдэж, амьдрах цоо шинэ арга зам болж, гэрэлтэх болно” гэж хунтайж Бин Салманы гаргасан танилцуулгад өгүүлжээ.
Саудын Арабын засгийн газар энэ төсөлд $500 тэрбумыг гаргаж байгаа. Бас дотоодын болон гадаадын хөрөнгө оруулалтыг татжээ.
Анх 2025 онд ашиглалтад оруулах төлөвлөгөөтэй байсан ч сүүлд таван жилээр хойшлуулсан юм байна.
Эх сурвалж: CNN
