Энэ оны эхний долоон сарын байдлаар манай улс 41,034 ширхэг суудлын автомашин импортолжээ.
Энэ нь 2021 оны мөн үеэс 18.7%, 2020 оны 26.5% тус тус өссөн дүн байна.
Монгол Улсын импорт эхний долоон сарын байдлаар өнгөрсөн оныхоос 24% өсөж, 4.8 тэрбум ам.долларт хүрснийг Гаалийн ерөнхий газар танилцуулсан. Үүний 97.6 хувийг валютын төлбөртэй худалдаа эзэлж байгаа юм.
Импортоор нийлүүлэгдсэн барааны 15.2% буюу 721.8 сая ам.доллар нь машин механик, тоног төхөөрөмж ба эд анги, цахилгаан хэрэгсэл, тэдгээрийн сэлбэг хэрэгсэл эзэлжээ.
Автомашины импорт цар тахлын хоёр жилд буурсан бол эргээд өсөх хандлагатай байна.
2020 онд импортолсон суудлын автомашины дундаж үнэ 5.6 мянган доллар байсан бол 2021 онд 6.9 мянган доллар болж 25% нэмэгдээд байсан юм.
ҮСХ-ны судалгаагаар Улаанбаатар хотод бүртгэлтэй суудлын автомашины тоо 2021 оны эцсийн байдлаар 478,469 болоод буй. Энэ нь өмнөх оноосоо 31 мянга орчмоор нэмэгдсэн үзүүлэлт. Харин нийт бүртгэлтэй тээврийн хэрэгсэл 2021 оны эцсийн байдлаар 662,644 байна.
