Уур амьсгалын өөрчлөлтийн улмаас дэлхийн хамгийн том арал Гринланд цас мөсөн бүрхүүлээсээ асар хурдтай салах болсон билээ.
Нөгөө талаас энэ өөрчлөлт нь тус арлын баялгийг олборлон ашиглах боломж олгож байна. Сонирхолтой нь Гринландын мөсийг хайлуулж буй дэлхийн дулаарлыг зогсоох эрдэс баялаг тус арлын хөрсөнд агуулагдаж байгаа ажээ.
Гринланд арлын баруун эрэг орчмын нутагт дэлхийд нэгд, эсвэл хоёрт эрэмбэлэгдэх кобальт, никелийн асар том орд байгаа гэнэ.
Энэ баялаг нь олон зуун сая цахилгаан хөдөлгүүрт автомашин үйлдвэрлэхэд шаардлагатай түүхий эд юм.
Гринланд арлын Диско арал, Нуссуакын хойг орчимд явуулж буй хайгуулын ажлыг Жэф Безос, Майкл Блүүмбэрг, Билл Гэйтс зэрэг тэрбумтнууд санхүүжүүлжээ.
Тэдний санхүүжүүлсэн хайгуулын ажлыг АНУ-ын Калифорнид байгуулагдсан Kobold Metals стартап компани хэрэгжүүлж байгаа гэнэ. Энэ компани нь хайгуулын ажлыг хиймэл оюун ухаанд суурилуулан хөгжүүлдэг ажээ.
Ирэх зун эхлэх өрөмдлөгийг хаанаас эхэлбэл хамгийн оновчтойг тодорхойлоход хиймэл оюуны технологи тусалж байгаа гэнэ. Бас Их Британид төвтэй Bluejay Mining компани уг төсөлд оролцож байна.
Гринланд арлыг кобальт, никелээс гадна нүүрс, зэс, алт, газрын ховор элементүүдийн ихээхэн нөөцтэй байх магадлалтай гэж Дани улсын геологичид үздэг юм.
Эх сурвалж: CNN
