-The Guardian: Ардчилалд үл итгэсэн байдлаас шалтгаалан АНУ иргэний дайны ирмэгт ирж магадгүй-
АНУ-д улс төрийн институциудад үл итгэх байдал нэмэгдэж байгаа нь тус улс дотооддоо шинэ мөргөлдөөний ирмэгт ирснийг харуулж байна гэж Британийн The Guardian сонинд нийтэлжээ.
Тус хэвлэлд бичсэнээр Калифорнийн галт зэвсгийн хүчирхийллийг судлах судалгааны төвийг үүсгэн байгуулагч, доктор Гарен Винтемут Америкт удахгүй болж мэдэх иргэний дайны тухай сэрэмжлүүлгийг хараад шоолж, "галзуу яриа" гэж нэрлэдэг байжээ. Гэвч тус төвөөс өнгөрсөн долдугаар сард явуулсан судалгаа түүнийг гайхшируулж, "галзуу яриаг" эрхбиш эргэцүүлэхэд хүргэжээ. Энэхүү судалгаагаар Америкчуудын тал хувь нь ойрын хэдэн жилд иргэний дайн болно гэсэн болгоомжтой байгаа бөгөөд таван оршин суугч тутмын нэг нь улс төрийн хүчирхийллийг зарим тохиолдолд зөвтгөдөг гэжээ.
Түүнчлэн тус улсын иргэдийн 40 хүртэлх хувь нь ардчилал хэвээр оршихоос илүү хүчтэй удирдагчтай байх нь чухал гэж үзсэн байна.
Америкийн ихэнх иргэд Байдены гадаад бодлогыг дэмжихгүй байгааг санал асуулгын дүн харуулжээ
Судлаачийн өөрийнх нь хэлснээр хүчирхийллийн аюул заналхийллийн өсөлт нь зэвсгийн борлуулалтыг нэмэгдүүлж байна. "Ирээдүйнхээ төлөө айж түгшиж, туйлширч, асар их бухимдалтай байгаа нийгэм рүү зэвсгийн "баглаа"-гаар шидээд байвал юу болох вэ?" гэж тэр асуужээ.
Иргэний мөргөлдөөний мэргэжилтэн Рэйчел Клейнфельд хэвлэлд өгсөн ярилцлагадаа АНУ-ын улс төрийн тогтолцоо нь тус улсад хүчирхийллийн мөргөлдөөн гарахгүй гэсэн баталгаа өгч чадахгүй байна. Хэрэв манай төрийн институциуд сулрах юм бол түүх өөрөөр эргэж магадгүй" гэж тэр хэлэв.
Клейнфельд дээрхи судалгааны үр дүнг "сэтгэл түгшээсэн" гэж мэдэгджээ. "Та гурваас таван сая америкчууд улс төрийн итгэл үнэмшлийнхээ төлөө бусад америкчуудад хор хөнөөл учруулахад бэлэн байгааг харж байна" гэж шинжээч тайлбарлав. Түүний хэлснээр, энэ нь АНУ-ын ард түмэн "ардчилалдаа маш их сэтгэл дундуур байгааг харуулж байна" гээд тэрээр энэ асуудалд "өөдрөг биш байна" гэж нэмж хэлэв.
Fox News өнгөрсөн долоо хоногт өөрийн санал асуулгаас иш татан мэдээлснээр Америкчуудын дөрөвний гурав нь тус улсын байдалд сэтгэл дундуур байна. Энэ үзүүлэлт тавдугаар сард 67 хувь байсан бол өнгөрсөн оны дөрөвдүгээр сард 53 хувь байжээ.
Эх сурвалж: Toim.mn