Бямба гарагийн орой Оросын улс төр судлаач, философич Александр Дугиний охин Дарья Дугинагийн жолоодож явсан автомашин Москвагийн ойролцоо дэлбэрсэн юм.
Дугин нь Оросын хэт үндсэрхэг үзлийг номлогч гэгддэг бөгөөд түүний охин эцгийнхээ онолыг түгээн дэлгэрүүлдэг сэтгүүлч байжээ.
Тэд Москвагийн ойролцоо болсон соёлын арга хэмжээнд оролцсоныхоо дараа хамт харих гэж байснаа больж, тус тусдаа явсан байна. Дугина эцгийнхээ Toyota Land Cruiser автомашиныг ганцаараа жолоодож яваад амиа алджээ.
Оросын мөрдөн байцаагчид Дугинагийн жолоодож явсан автомашины суудлын дор тэсрэх бөмбөг байрлуулсныг урьдчилсан байдлаар тогтоосон байна.
Энэ аллагаар Дарьяг биш, эцгийг нь устгах төлөвлөгөөтэй байсан гэж мөрдөгчид дүгнэжээ. Аллагад Украины тусгай алба, тагнуулын албыг хамгийн түрүүнд сэжиглэж байна. Дугин болон түүний охин Украинд явуулж буй Оросын дайныг талархан дэмжигчид байсан юм.
Харин өчигдөр Украины ерөнхийлөгчийн зөвлөх Михаило Подоляк аллагад тус улс холбоогүйг баталжээ. “Украин бол ОХУ шиг гэмт хэрэг үйлддэг, террорист улс биш тул үүнд ямар ч оролцоогүйг би батлан илэрхийлж байна” гэж Подоляк орон нутгийн телевизээр ярьсан юм.
Өрнөдийн зарим хэвлэлүүд Александр Дугинийг Кремлийн гадаад бодлогыг тодорхойлогч, ОХУ-ын ерөнхийлөгчид нөлөөтэй хүн гэж мэдээлж байгаа.
Харин зарим судлаачид үүнийг “хэтрүүлэг” гэж үзэж байна. Дугин нь ОХУ-ын төрд ямар нэг албан тушаал хашдаггүй юм.
Тухайлбал Их Британийн Royal United Service Institute стратегийн судалгааны байгууллагын шинжээч Самуэл Рамани уг аллага Александр Дугинийг чиглэсэн нь тодорхой ч түүнийг Кремлийн гадаад бодлогыг тодорхойлогч гэж нэрлэх нь “дэгсдүүлсэн хэрэг” гэж үзэж байгаагаа ярьжээ.
Эх сурвалж: Aljazeera
