Оросын Холбооны Аюулаас Хамгаалах Алба өчигдөр гаргасан мэдэгдэлдээ сэтгүүлч Дарья Дугинагийн аллагад Украины тагнуулын албыг буруутгажээ.
Дугина нь Оросын хэт үндсэрхэг үзлийг номлогч Александр Дугиний охин байв. Бямба гарагийн орой Москвагийн ойролцоо түүний жолоодож явсан Toyota Land Cruiser автомашин дэлбэрсэн юм.
Украины тал уг аллагад оролцоогүйгээ өмнө нь мэдэгдээд байгаа. 60 настай Александр Дугин нь хуучин Оросын эзэнт гүрний газар нутгийг, орос хэлээр ярьдаг хүн амыг зэвсгийн хүчээр нэгтгэх ёстой гэсэн үзлийг хүчтэй сурталчилдаг нэгэн юм.
Түүний охин Дарья эцгийнхээ үзлийг дэмжигч, хэвлэл мэдээллээр түгээн дэлгэрүүлэгч байжээ.
Өчигдөр бас Александр Дугин охиныхоо аллагатай холбоотой мэдэгдэл анх удаа хийсэн байна.
“Бидний зүрх сэтгэл зүгээр нэг өшөө авалтаар цангаж байдаггүй юм. Бидэнд Украиныг ялах ялалт л хэрэгтэй. Миний охин ялалтын тахилын ширээн дээр залуу насаа золиосоллоо. Тиймээс заавал ялах хэрэгтэй!” гэж Дугин мэдэгджээ.
Оросын Холбооны Аюулаас Хамгаалах Алба өчигдөр аллагыг үйлдсэн гэх 1979 онд төрсөн украин эмэгтэйн тухай мэдээллийг хэвлэлээр цацсан байна.
Уг мэдээллээр бол сэжигтэн нь Украины тагнуулын албатай холбоотой, Азовын батальоны гишүүн гэнэ.
Энэ эмэгтэй өсвөр насны охинтойгоо хамт долдугаар сард ОХУ-д ирээд Дугинагийн гэрийн ойролцоо байр хөлслөн аллагад бэлдэж байсан гэжээ.
Ингэхдээ мөрөө буруулахын тулд гурван өөр дугаартай Mini Cooper автомашинаар Дугинаг мөрдөж байсан гэнэ. Улмаар Бямба гарагт Дугинагийн эцгийн хамт оролцсон арга хэмжээнд мөн оролцож, алсын удирдлагатай бөмбөгийг автомашинд нь байрлуулсан тухай мэдээлжээ.
Аллагын дараа сэжигтэн эмэгтэй мөрдлөгт ашиглаж байсан Mini Cooper автомашинаараа Эстони улс руу зугтсан тухай Холбооны Аюулаас Хамгаалах Албаны эх сурвалж мэдээлсэн байна.
Оросын хууль хүчний байгууллагууд сэжигтэн эмэгтэйг эрэн сурвалжлагдаж буй хүмүүсийн жагсаалтад нэмж, шилжүүлж өгөх хүсэлтийг Эстони улсад гаргажээ.
Эстони улсын гадаад хэргийн яам энэ талаар мэдээлэл өгөхөөс татгалзсан байна. ОХУ-ын ерөнхийлөгч Владимир Путин алагдсан сэтгүүлч эмэгтэйд хүндэтгэл үзүүлж, түүнийг “Оросын эх оронч” гэж өргөмжилжээ.
Кремлийн алдартай суртал нэвтрүүлэгч Маргарита Симоньян алуурчин эмэгтэйн араас Оросын тагнуулчдыг илгээх санал гаргасан байна.
“Мэдээж Эстони улс түүнийг бидэнд шилжүүлж өгөхгүй. Таллинн хотын цамхгуудыг үзэж бишрэх хүсэлтэй мэргэжлийн хүмүүс манайд байгаа гэж би бодож байна” гэж тэр Телеграм хуудсандаа бичжээ.
Дарья Дугинатай салах ёс гүйцэтгэх арга хэмжээ өнөөдөр Москвагийн телевизийн төв байранд зохион байгуулагдах юм байна.
Эх сурвалж: Reuters
