Мягмар гарагт Малайз улсын ерөнхий сайд асан Нажиб Разак давж заалдах шатны шүүх дээр ялагдсан тул 12 жилийн хорих ялаа эдэлж эхэлжээ.

69 настай экс ерөнхий сайд Малайзын баялгийн сан 1MDB (1Malaysia Development Berhard)-ын хөрөнгийг идэж шамшигдуулсан хэрэгт шийтгэгдэж байгаа юм.

Шүүх 2020 оны долдугаар сард түүнд хорих ял оноосон ч давж заалдсаны үр дүнд батлан даалтад гараад байжээ.

Разак хорих ялаа эдэлж эхлэх хугацааг хойшлуулах хүсэлт гаргасныг шүүх зөвшөөрөөгүй байна.

Малайзын шүүх түүнд нийт долоон зүйл ангиар ял тулгасан юм. Эдгээрийн дотор 1MDB сангийн 42 сая ринггитийг ($9.4 сая) хувийн дансандаа шилжүүлж авсан хэрэг багтаж байгаа.

Тэрбээр шоронд 12 жил хоригдож, 210 сая ринггитийн ($46.8 сая) торгууль төлөхөөр болж байна.

Разак хувьдаа завшсан мөнгийг сангийн хөрөнгө биш, Саудын Арабын язгууртнуудын хувийн бэлэг гэж ойлгож байснаа мэдүүлсэн юм.

Тэр бас одоо эрэн сурвалжлагдаж байгаа санхүүгийн зөвлөх нь асан Жо Лоу гэгчид залилуулсан гэж мэдүүлж байжээ.

1MDB сангийн хөрөнгөтэй холбоотой нийт таван хэргийг Малайзын шүүх шийдвэрлэхээс анхных нь энэ болж байна.

Өчигдөр Нажиб Разак шүүхийн шийдвэрийг давж заалдах сүүлчийн боломжоо ашигласан нь үр дүнд хүрсэнгүй.

Одоо түүний гэргий Росмах Мансортой холбоотой мөнгө угаасан, татвараас зугтсан зэрэг хэргүүдийг есдүгээр сарын 1-ний өдөр шүүх юм.

Малайз улсын хувьд төдийгүй бүс нутгийн хувьд өчигдрийн шүүхийн шийдвэр түүхэн үйл явдал болж байна. Тус улсад өмнө нь Нажиб Разакын түвшний улс төрч хэзээ ч шоронд хоригдож байгаагүй юм. Одоо түүнд шоронгоос суллагдах ганц боломж бий.

Малайзын улс төрд нөлөө бүхий Разак хэрвээ ирэх сонгуульд нам нь ялбал эзэн хааны өршөөлд хамрагдаж болзошгүй юм.

61 жил тасралтгүй засагласан UMNO (United Malaysia National Organization) нам 2018 оны сонгуульд ялагдсан нь Нажиб Разакыг тойрсон авлига, албан тушаалын дуулиантай холбоотой байжээ.

Эх сурвалж: BBC