Өчигдөр буюу Лхагва гараг нь Украин улс Зөвлөлт Холбоот Улсын бүрэлдэхүүнээс гарч, тусгаар тогтнолоо зарласны 31 жилийн ойн өдөр байлаа.
Энэ өдөр тус улсын нэг хотын төмөр замын өртөө Оросын агаарын цохилтод өртөх үеэр 22 хүн алагдаж, олон арван хүн шархадсан байна.
“Өнөөдөр бидний зовлон шаналал Чаплино боллоо. Сүүлийн байдлаар 22 хүн амиа алдсанаас тав нь автомашинд шатсан байна. Оросын пуужин гэрийг нь оноход 11 настай хүү алагдлаа” гэж Украины ерөнхийлөгч Володимир Зеленский ээлжит мэдэгдэлдээ өгүүлжээ.
Чаплино нь Оросын хяналтад байгаа Донецкийн газар нутгаас баруун зүгт 145 км зайтай оршдог жижиг хот юм.
Мягмар гарагт Зеленский хэлэхдээ тусгаар тогтнолын өдрийг нь тохиолдуулан Оросын талаас довтолгоогоо эрчимжүүлж болзошгүйг анхааруулж байв.
Халдлага довтолгооноос сэргийлэх зорилгоор өчигдөр Украины эрх баригчид олон нийтийн баярын арга хэмжээнүүдээ цуцалсан юм.
Өчигдөр нийслэл Киев хотод нийтдээ долоон удаа агаарын довтолгооны түгшүүр зарласан ч ямар нэг халдлага гараагүй өнгөрсөн байна.
Өчигдөр Узбекистаны нийслэлд болсон уулзалтад оролцох үеэрээ ОХУ-ын батлан хамгаалахын сайд Сергей Шойгу тус улсын арми энгийн иргэдийн амь нас үрэгдэхээс сэргийлэх зорилгоор байлдааны ажиллагаагаа зориуд удаашруулаад байгааг хэлжээ.
Тусгаар тогтнолын ойн өдрийг тохиолдуулан Володимир Зеленский гэргийн хамт 11 дүгээр зууны Гэгээн Софийн цогчин дуганд мөргөл үйлдэж, дайнд амиа алдсан цэргүүдийн хөшөөнд цэцэг өргөсөн байна.
Ойг тохиолдуулж хэлсэн үгэндээ Зеленский эзлэгдсэн газар нутгаа, тухайлбал дорнод Украин, Крымийн хойгийг бүрэн чөлөөлөхөө амлажээ.
“Бид толгойдоо буу тулгуулж, айдас хүйдсийн дор хэлэлцээний ширээний ард суухгүй. Бидний хувьд хамгийн аймшигтай төмөр бол пуужин, онгоц, танк биш, харин дөнгө юм” гэж тэр хэлсэн байна.
Эх сурвалж: Reuters