Оросын сөрөг хүчний улс төрчдөөс шийтгүүлээгүй үлдсэн сүүлчийн хүн гэгддэг Евгений Ройзманыг өчигдөр баривчилжээ.

Түүнийг Украины дайныг шүүмжилж, Оросын армийн нэр хүндэд халдсан хэрэгт буруутгасан байна.

Евгений Ройзман нь Оросын дөрөв дэх том хот Екатеринбургийн дарга асан хүн юм. Тэрбээр Украины дайныг “эзлэн түрэмгийлэл” гэж олон нийтийн дунд ярьсныхаа төлөө таван жилийн хорих ял сонсож магадгүй байна.

Сүүлийн байдлаар ОХУ-д Украинд болж буй үйл явдлыг “дайн”, “эзлэн түрэмгийлэл” гэж нэрлэсэн 224 хүн шүүхээс хорих ял сонсож, дайныг эсэргүүцэх хөдөлгөөнд оролцсон 16,500 орчим хүн баривчлагдсан тухай OVD-Info хүний эрхийн байгууллага өчигдөр мэдээлжээ.

Ройзман энэ оны гуравдугаар сард “The Observer” сонинд “Гуравдугаар Рэйхийн үед фашизмыг эсэргүүцэгчид ямар байдалд байсныг би одоо л ойлгож байна. Гэхдээ би дуугүй сууж чадахгүй” гэж ярьж байсан юм.

Тухайн үед Ройзмантай хамт ярилцлага өгсөн зургаан хүний гурав нь баривчлагдаж байжээ. Ройзман ч баривчлагдах нь цаг хугацааны асуудал гэдгийг ойлгож, авч явах эд зүйлсээ бэлдээд байсан гэнэ.

Гэрийнх нь гадаа хүлээж байсан сэтгүүлчид түүнээс “эзлэн түрэмгийлэл” гэдэг үгийг хаана хэрэглэснийг асуухад Ройзман “хаа сайгүй” гэж хариулжээ.

Оросын сөрөг хүчний улс төрчдөөс Ройзман сонгуульд ялалт байгуулж, 2013-2018 оны хооронд Екатеринбург хотын даргаар ажилласан нь ховор тохиолдол болж байв.

Оросын эрх баригчид хотын ард иргэд баривчилгааг эсэргүүцэхээс болгоомжлон Ройзманыг шууд Москва руу хүргэсэн байна.

Евгений Ройзман нь орон нутагтаа маш их нэр хүндтэй хүн юм. Тэрбээр 90-ээд оны үед мансууруулах бодист донтогчдыг эмчилж, хүмүүсийн хүндлэлийг хүлээж байжээ.

Улс төрч болсныхоо дараа Ройзман хүмүүстэй ойр харилцаж, Екатеринбург хотын гудмаар долоо хоног бүр гүйхдээ уулзсан хүн бүрийн асуудлыг шийдэж өгдөг байв.

Тэр бас сошиал хуудсаараа төрийн албан хаагчдын үйл ажиллагааг байнга шүүмжилдэг нэгэн байжээ.

Эх сурвалж: The Guardian