СТАТИСТИК: Нийслэлд бүртгэлтэй тээврийн хэрэгслийн 54% нь ТЭГШ тоогоор төгссөн улсын дугаартай

Нийслэлийн автозамын ачааллыг бууруулахын тулд машины улсын дугаарын сүүлийн орноор нь хязгаарлан хөдөлгөөнд оролцуулахаар шийдвэрлэсэн.

Уг хязгаарлалт наймдугаар сарын 27-ноос есдүгээр сарын 3-ныг дуустал үргэлжилнэ. Тодруулбал,

Сондгой тоогоор төгссөн дугаартай автомашинууд наймдугаар сарын 27, 29, 31-н болон есдүгээр сарын 2-нд
Тэгш тоогоор төгссөн дугаартай автомашинууд наймдугаар сарын 28, 30-н болон есдүгээр сарын 1, 3-нд хөдөлгөөнд оролцох юм.

Тэгвэл энэхүү шийдвэртэй холбоотойгоор нийслэлд бүртгэлтэй автомашинуудын хэдийнх нь улсын дугаар тэгш, сондгой тоогоор төгссөн байдаг талаар Автотээврийн Үндэсний Төвөөс тодруулав.

Манай улсад 1.3 сая тээврийн хэрэгсэл байдаг бол үүний 695,424 нь нийслэл Улаанбаатар хотод бүртгэлтэй байна. Эдгээрийг улсын дугаарын сүүлийн орноор нь ангилан үзвэл,

46 хувь нь сондгой (1, 3, 5, 7, 9)
54 хувь нь тэгш (0, 2, 4, 6, 8) тоогоор төгссөн дугаартай аж.

Сүүлийн жилүүдэд манай улсад 70-80 мянган тээврийн хэрэгсэл бүртгэгдэж байгааг ТЦА-ны Замын цагдаагийн газрын дэд дарга, хурандаа Б.Батболд өчигдөр хэлсэн. Энэ он гарснаас хойш наймдугаар сарын байдлаар 58 мянган машин импортоор орж ирж, бүртгүүлсэн байна.