Даваа гарагт Украины арми тус улсын өмнөд бүс нутгийн хэд хэдэн чиглэлд сөрөг довтолгоогоо эхлүүлсэн тухай эх сурвалжууд мэдээлжээ.

Энэ нь Оросын эзлэн түрэмгийллээс газар нутгаа чөлөөлөх удаан хүлээгдсэн байлдааны ажиллагааны эхлэл бололтой.

“Украины зэвсэгт хүчин Херсон хотын ойролцоо эзлэн түрэмгийлэгчдийн хамгаалалтын эхний шугамыг эвдлээ. Өрнөдийн зэр зэвсгийг амжилттай ашиглаж чадвал эзлэгдсэн газар нутгаа буцааж авах бодит боломж бий гэж бид үзэж байна” гэж Украины стратегийн харилцааны төвөөс мэдээлжээ.

АНУ-ын батлан хамгаалах яамны эх сурвалж бас Украины арми сөрөг довтолгоо эхлүүлсэн тухай мэдээллийг баталсан байна.

Украины экс ерөнхийлөгч Петро Порошенко “Энэ бол удаан хүлээгдсэн сөрөг довтолгоо юм. Ажиллагаа өглөөний 7:00 цагт их буу, пуужингийн цохилтоор эхэллээ. 2022 оны хоёрдугаар сараас хойш Украины цэргүүд анх удаа Өрнөдийн их буу, HIMARS, пуужингуудыг хамтад нь сөрөг довтолгоонд ашиглаж байна” гэж CNN сувагт ярьжээ.

Украины өмнөд командлалын хэвлэлийн төлөөлөгч Наталья Гуменюк “Тиймээ. Украины зэвсэгт хүчин эзлэгдсэн газар нутгаа чөлөөлөх сөрөг довтолгоог өмнөд фронтын хэд хэдэн чиглэлд эхлүүллээ. Ажиллагаа бүрэн хэрэгжсэний дараа илүү дэлгэрэнгүй мэдээлэл өгөх болно” гэж CNN сувагт ярьсан байна.

Өмнөд бүсийн Херсон хот бол гуравдугаар сарын эхээр Оросын цэрэгт эзлэгдсэн Украины анхны томоохон хот юм.

Украины тал сөрөг довтолгооны талаар удаан ярьж байгаа ч бодитой алхам хийж эхлээгүй байв. Өмнөд Украины өөр нэг халуун цэг нь Запорожийн атомын цахилгаан станц болоод байгаа.

Уг станц нь Херсон хотоос зүүн зүгт, Днепр мөрний эрэгт оршдог. Оросын тал станцыг барьцаалж, хамгаалалт болгон ашиглаж байгаа хэмээн Украины тал буруутгадаг.

Хэрвээ энд осол гарвал бүс нутгийг хамарсан томоохон цөмийн гамшиг гарах эрсдэлтэй байна.

Станцын нөхцөл байдлыг шалгаж, үнэлэх Олон Улсын Атомын Эрчин Хүчний Агентлагийн мэргэжилтнүүдийн баг энэ долоо хоногийн сүүлээр Запорожьед очих төлөвлөгөөтэй байгаа юм.

Эх сурвалж: Business Insider