АНУ-ын сансар судлалын үндэсний байгууллага NASA ирэх сард Армагеддон маягийн ажиллагааг сансрын уудамд зохион байгуулахаар бэлдэж байна.
Өөрөөр хэлбэл сансрын том биетийг өөрийн илгээсэн хөлөгтэй мөргөлдүүлэх юм. Астероидууд сансрын уудамд тэнүүчлэхдээ дэлхийтэй ойрхон өнгөрөх үзэгдэл түгээмэл гардаг. 65 сая гаруй жилийн өмнө томоохон биет дэлхийтэй мөргөлдөхөд үлэг гүрвэлийн ертөнц сүйрсэн гэж үздэг юм.
Тэгвэл NASA ирээдүйн ийм гамшигт бэлдэх зорилгоор DART (Double Asteroid Redirection Test) нэртэй сансрын хөлгөө Диморфос (Dimorphos) нэртэй астероидтой мөргөлдүүлж, туршихаар төлөвлөжээ.
Диморфос нь Дидимос (Didymos) нэртэй өөрөөсөө том астероидыг тойрон эргэлдэж байдаг.
Эдгээрийн аль нь ч дэлхийтэй мөргөлдөх эрсдэлгүй харагдаж байгаа. Гэхдээ 150 гаруй метр урттай Диморфос дэлхийтэй мөргөлдвөл ноцтой гамшиг учруулах боломжтой.
Мөргөлтийн үр дүнд юу болохоос үл хамааран эрдэмтэд маш чухал мэдээлэл цуглуулах юм. Нэг үгээр хэлбэл мөргөлтийн үр дүн астероидын хөдөлгөөний чиглэлд ямар нөлөө үзүүлэхийг судлах юм байна.
Дэлхийгээс хөөрснөөсөө хойш 10 сарын дараа DART хөлөг есдүгээр сарын 26-ны өдөр Улаанбаатарын цагаар 19:14 цагт Диморфос астероидтой мөргөлдөх ажээ.
Сансарт болох уг үйл явдлыг NASA өөрийн телевиз, вэб сайт, сошиал сувгуудаараа шууд дамжуулах юм байна.
Мөргөлтөөс 10 хоногийн өмнө DART өөрөөсөө жижиг хөлгийг салгах ба энэ нь үйл явдлыг хөндлөнгөөс ажиглаж, дүрсийг дэлхийд дамжуулах ажээ.
Мөргөлдөөн дэлхийгээс 10 сая орчим километрийн алсад болно. DART хөлөг 24,000 км/цаг хурдаар астероидыг мөргөхдөө багахан доргиох ба тойрог замынх нь хөдөлгөөний замыг 1 хувиар гажуудуулах юм. Энэ нь дэлхийг чиглэн ирж буй сансрын биетийг холдуулахад хангалттай өөрчлөлт ажээ.
Эх сурвалж: Associated Press
