Амазоны ширэнгэд гадаад ертөнцөөс тусгаарлагдан оршиж байсан овгийн сүүлчийн хүн нас барсныг Бразилын эрх баригчид өчигдөр мэдээлжээ.

Нэр үл мэдэгдэх энэ хүн сүүлийн 26 жилийн турш хүмүүсээс зугтаж, ганцаараа амьдарсан юм байна.

Нүх ухаж, амьтан агнадаг, мөн тэр нүхэндээ хүмүүсээс нуугддаг байсан тул түүнийг хүмүүс “нүхний хүн” гэж хочилдог байжээ.

Наймдугаар сарын 23-ны өдөр түүний цогцсыг сүрлэн овоохойнх нь дэргэдээс олсон байна. Биед нь ямар нэг гаднын халдлагын шинж тэмдэг илрээгүйг мэдээлжээ.

Овгийн сүүлчийн гишүүнийг 60 орчим насандаа байгалийн жамаар нас барсан гэж дүгнэж байна.

Тэрбээр Боливи улстай хил залгадаг Бразилын Рондониа мужийн Танару уугуул иргэдийн бүс нутагт оршиж байсан овгийн сүүлчийн хүн юм.

Түүний овгийн ихэнх гишүүн 1970-аад оны үед газар нутгийг нь булаах гэсэн хүмүүст алагджээ. 1995 онд хууль бус уурхайчид тус овгийн зургаан хүнийг алсны дараа ганц хүн амьд үлдсэн нь ийнхүү нас барж байна.

Бразилын уугуул иргэдийн хэрэг эрхлэх газар овгийн сүүлчийн хүн үлдсэнийг 1996 онд мэдэж, тэр цагаас хойш байнга алсаас ажиглаж, хамгаалж байжээ.

Талийгаачийн цогцсыг олоход макав хэмээх шувууны өдөөр хучигдсан байсан гэнэ. Судлаачид түүнийг үхэхээ мэдээд урьдчилж ийм зан үйл хийсэн гэж үзэж байна.

Түүнийг ямар хэлээр ярьдаг, ямар угсаа гаралтайг мэдэж чадаагүй юм. 2018 онд Бразилын эрх баригчид ширэнгэнд мод цавчиж байгаа түүний дүрсийг алсаас буулгаж байжээ.

Бразилын Амазон мөрний сав дагуу ширэнгэ ойд өнөөдөр 240 орчим овгийн уугуул хүмүүс амьдардаг байна. Тэд сүүлийн жилүүдэд хууль бус уурхайчид, мод бэлтгэгчид, газраа тэлэх гэсэн фермерүүдийн дайралтад байнга өртөх болжээ.

Эх сурвалж: BBC