Энэтхэгийн тэрбумтан Гаутам Адани дэлхийн гурав дахь баян хүн болсныг Блүүмбэрг агентлаг өчигдөр мэдээлжээ.
Ингэснээр тэр дэлхийн тэргүүн гурван баяны нэг болсон анхны Ази хүн болсон байна.
Сүүлийн нэг жилийн хугацаанд Аданигийн хөрөнгийн хэмжээ $137.4 тэрбумд хүрснээр тэрбумтнуудын жагсаалтад 20 байраар ахиж, зөвхөн Илон Маск, Жэф Безос хоёрын дараа эрэмбэлэгджээ.
Одоо 60 настай Адани өөрийн хүчээр баяжсан хүн гэгддэг. Тэрбээр боомтуудын үйл ажиллагаа, түүхий эдийн арилжаанаас анхны хөрөнгөө босгосон бол одоо маш олон салбарт бизнес эрхэлдэг юм.
Түүний 75 хувийг нь эзэмшдэг Adani Enterprises компанийн хувьцааны ханш 2020 оны гуравдугаар сараас хойш 2,400 гаруй хувиар өссөн бол сүүлийн зургаан сарын дотор хоёр дахин өссөн юм.
Үүнээс гадна Adani Transmission, Adani Power, Adani Ports, Adani Green Energy зэрэг бусад компаниудынх нь үнэлгээ ч хурдтай өсөж байгаа.
Адани нь Гужарат мужийн Ахмедабад хотод дундаж давхаргын гэр бүлд төрсөн юм. Тэрбээр их сургуулиа төгсөлгүй хаяж, 1988 онд экспортын бизнесээ эхлүүлж байжээ.
1995 онд Адани төрөлх мужийнхаа Мундра хотод боомт байгуулж, үйл ажиллагаа явуулах эрх авсан нь өнөөдөр Энэтхэгийн хамгийн том боомт болсон байна.
Сүүлийн жилүүдэд тэр химийн үйлдвэрлэл, дата төв, зэс боловсруулах үйлдвэр, сэргээгдэх эрчим хүчний салбарт идэвхтэй ажиллаж байгаа.
Бас Энэтхэгийн хэвлэл мэдээллийн салбарт хөрөнгө оруулж, 5G сүлжээ байгуулах зөвшөөрөл авахаар ажиллаж эхэлжээ.
Эх сурвалж: AFP
