Өнгөрсөн долоо хоногт Украины армийн эхлүүлсэн сөрөг довтолгооны үр дүнд тус улсын өмнөд болон дорнод бүсийн гурван суурин, зарим газар нутгийг чөлөөлсөн тухай ерөнхийлөгч Володимир Зеленский өчигдөр мэдээлжээ.
Ням гарагт Украины зэвсэгт хүчин, тагнуулын байгууллагын удирдлагуудтай хийсэн уулзалтын үеэр ийм мэдээлэл өгснийг Зеленский хэлсэн ч чөлөөлөгдсөн газар нутгийн нэрс болон хэзээ чөлөөлсөн талаар дурдаагүй байна.
Тухайлбал Украины дорнод бүсийн Донецк мужийн нэг, өмнөд бүсийн хоёр сууриныг чөлөөлснөөс гадна дорно зүгт Лисичанск-Сиверск чиглэлд амжилттай давшсан тухай мэдээлжээ.
Ням гарагийн өглөө Украины ерөнхийлөгчийн тамгын газрын дэд дарга Кирило Тимошенко өмнөд бүсийн нэгэн тосгонд Украины далбааг мандуулж буй цэргүүдийн гэрэл зургийг сошиал хуудсандаа нийтэлж байв.
Тэрбээр уг зурагтаа “Високопилля, Херсон муж, Украин. Өнөөдөр” гэсэн тайлбар бичжээ.
Крымийн хойгийн хойд хэсэгт оршдог Херсон муж Украинд Оросын цэрэг халдан довтолсон эхний өдрүүдэд эзлэгдэж байв. Луганск мужийн Лисичанск хотыг долдугаар сарын эхээр Оросын цэрэг эзлэн авч байжээ.
Зеленский өчигдөр хийсэн видео мэдэгдэлдээ фронтын шугамд амжилттай тулалдаж буй цэргүүддээ талархал илэрхийлсэн байна.
Эх сурвалж: Reuters
