Өнгөрсөн Пүрэв гарагт Оросын “Yandex Taxi” онлайн такси дуудлагын үйлчилгээ хакеруудын гарт орсны улмаас Москва хотын төвд замын томоохон түгжрэл үүссэн байна.
Тухайлбал хакерууд тус үйлчилгээний бүх таксиг Кутузовын өргөн чөлөөнд нэг цагт дуудаж, зохиомол ачаалал үүсгэжээ.
Хуурамч дуудлагаар цугларсан таксинууд араас араасаа цувран гудамж түгжрүүлснийг харуулсан зураг, дүрс сошиал орчинд өргөн тарсан байна.
Someone hacked #YandexTaxi and ordered all available taxis to Kutuzov Prospect in Moscow
— Russian Market (@runews) September 1, 2022
Now there is a huge traffic jam with taxis.
It‘s like James Bond movie. pic.twitter.com/IatuAEtA2i
Москва хот нь өнгөрсөн онд авто замын түгжрэлээр дэлхийд хоёрт эрэмбэлэгдэж байжээ. Гэхдээ энэ удаагийн түгжрэл нь замын ерөнхий ачаалалтай холбоогүй, хакеруудын хорлон сүйтгэх ажиллагааны үр дүн байсан гэнэ.
Yandex компаниас гаргасан мэдэгдэлд замын түгжрэл цаг хүрэхгүй хугацаанд үргэлжилсэн ба дахин ийм халдлага гаргахгүй байх арга хэмжээг авсан гэжээ.
Тус компани ямар хакерын бүлэг халдлагыг үйлдсэн талаар нэр дурдаагүй байна. Сүүлд олон улсад алдартай Anonymous бүлэг үүний цаана байснаа хүлээн зөвшөөрчээ.
Тус бүлэг Украины дайн эхэлсний дараа ОХУ-д “кибер дайн” зарлаж байсан юм.
Тэд нэг удаа Оросын төв телевизийн сувгаар Украины дайнтай холбоотой, Москвагийн эрх баригчдын хориглосон мэдээг цацаж байжээ.
Мөн Оросын засгийн газрын болон хувийн байгууллагуудын хэдэн терабайтын хэмжээтэй цахим шууданг хулгайлснаа мэдэгдэж байв.
Эх сурвалж: The Verge
