Хууль зүй, дотоод хэрийн сайд Х.Нямбаатар түгжрэлийн асуудлаар байр сууриа илэрхийллээ.
Тэрбээр "Түгжрэл гэдэг бол зөвхөн импортын машиныг хориглох эсвэл дугаарыг хязгаарлах байдлаар шийдэх асуудал биш. 1970-аад оны дундуур тавдугаар ерөнхий төлөвлөгөөг хийх явцад Улаанбаатар хотыг 80 гаруй мянган автомашинтай байна гэж тооцож, авто замын зураг зурагдсан.
Харин өнөөдөр нийслэлд 600-615 мянган автомашин замын хөдөлгөөнд оролцож, ямар байдалтай байгааг бүгд мэдэж байгаа. Тэгэхээр түгжрэлийг бууруулахын тулд олон ажлыг цогцоор нь хийх ёстой.
Нэгдүгээрт, Улаанбаатар хотоос орон нутаг руу шилжин суурьших асуудлыг төр засгийн бодлогоор дэмжиж, бүсийн нэмэгдэл олгох, аж ахуйн нэгжийн болон хүн амын орлогын албан татвараас хөнгөлж чөлөөлөх олон хөшүүргийг хэрэгжүүлэх нь чухал. Орон нутаг руу явах хандлагыг бий болгох нь зөв.
НИТХ-ын нэр бүхий төлөөлөгч нар тогтоолын төсөл санаачилж байгаа талаар сонссон. Буруу талдаа жолооны хүрдтэй автомашиныг тодорхой он зааж Улаанбаатар хотын замын хөдөлгөөнд оролцуулахгүй байх талаар нийслэлийн иргэдийн дунд санал асуулга явуулах тогтоолын төсөл боловсруулж байгаа гэж дуулдсан.
Тойрог хурдны зам, метро, LRT гээд Улаанбаатар хотоос гадагшлах нийгэм, эдийн засгийн цогцолбор арга хэмжээнүүдийг авах хүртэл импортоо хязгаарлах асуудлыг бид яах вэ гэдгийг иргэд олон нийтээс санал асууж, шийдүүлэх ёстой" гэв.
