Даваа гарагт Кабул хот дахь ОХУ-ын элчин сайдын яамны гадаа амиа золиослогч бөмбөг дэлбэлэх үеэр зургаан хүн амь үрэгдэж, арав гаруй хүн шархадсан тухай Афганистаны албаныхан мэдээлжээ.
Амиа алдагсдын хоёр нь элчин сайдын яамны ажилтнууд, бусад нь Афганистаны иргэд байсан байна.
Оросын дипломат ажилтан элчин сайдын яамны гадаа визийн хариу хүлээж байсан хүмүүстэй уулзахаар гарч ирэх үед дэлбэрэлт болсныг РИА Новости агентлаг мэдээлжээ.
Одоогоор халдлагыг хэн үйлдсэн нь тодорхой болоогүй байна. Исламын Улс олон улсын террорист байгууллагын Афганистан дахь салбар тус улсад Талибаны дэглэм тогтсоноос хойш халдлага, хорлон сүйтгэх ажиллагаагаа эрчимжүүлээд байгаа.
“Террорист халдлагыг зохион байгуулсан этгээдүүд зохих шийтгэлээ аль болох богино хугацаанд хүлээнэ гэдэгт бид найдаж байна” гэж ОХУ-ын гадаад хэргийн сайд Сергей Лавров өчигдөр Москва хотод хийсэн мэдэгдэлдээ хэлжээ.
Талибаны хууль хүчнийхэн элчин сайдын яамны ойр орчимд хяналтаа чангатгаж, халдлагын мөрөөр шалгаж эхэлснийг тэр бас мэдэгдсэн байна.
ОХУ нь Афганистанд Талибаны дэглэм тогтсоноос хойш Кабул дахь элчин сайдын яамаа хаагаагүй цөөхөн улсын нэг юм. АНУ-ын цэрэг Афганистанаас гарсны дараа ОХУ-ын тус улс дахь нөлөө нэмэгдэж эхлээд байгаа.
Энэ удаагийн террорист халдлага нь талуудын сайжирч буй харилцаанд саад учруулах зорилготой байж болзошгүй гэж ажиглагчид дүгнэж байна.
Эх сурвалж: Associated Press
