Оросын хяналтад байгаа Украины Запорожийн цөмийн цахилгаан станцын аюулгүй байдлыг НҮБ-ын мэргэжилтнүүд шалгаж байгаа.

Орос, Украины талууд уг станц руу гал нээж, цөмийн гамшиг үүсгэх эрсдэл бий болгосонд харилцан нэгнээ буруутгаж байгаа билээ.

Тэгвэл НҮБ-ын Олон Улсын Атомын Эрчим Хүчний Агентлагийн мэргэжилтнүүдэд Оросын албаны хүн Украины пуужин 180 градус эргэж, станцын ойролцоо туссан болохыг тайлбарлажээ. Түүний англи, орос хэлээр, гарын дохио зангааны тусламжтай тайлбарлаж буйг харуулсан дүрс бичлэг сошиал сүлжээ, хэвлэлүүдээр тарсан байна.

Оросын талаас харвасан мэт харагдаж буй пуужинг тэр чиглэлээ 180 градус эргүүлсэн Украины пуужин байсан хэмээн итгүүлэхийг оролджээ.

Тайлбар өгч буй Оросын албаны хүн нь Росатом компанийн зөвлөх Ренат Карчаа болохыг эх сурвалжууд тодруулсан байна.

Тухайлбал Оросын ТАСС агентлаг Карчааг НҮБ-ын мэргэжилтнүүдэд газарчилж, станцын нөхцөл байдалтай танилцуулж буй тухай мэдээлжээ.

Украины эрчим хүчний сайд Герман Глущенко мэргэжилтнүүдэд худал мэдээлэл өгч буй Карчааг фэйсбүүк хуудсандаа шүүмжлэн бичсэн байна.

Европ тивдээ хамгийн томд тооцогддог Запорожийн цөмийн цахилгаан станцыг гуравдугаар сарын эхээр Оросын цэргүүд эзлэн авсан юм. Станцын үйл ажиллагааг Украины төрийн өмчит Энергоатом компани хариуцан ажиллуулж байгаа.

Олон Улсын Атомын Эрчим Хүчний Агентлагийн тэргүүн Рафаэл Гросси станцын аюулгүй ажиллагааны горим хэд хэдэн удаа ноцтой зөрчигдсөнийг шалгалтын явцад тогтоосноо өнгөрсөн Пүрэв гарагт мэдэгдсэн юм.

Эх сурвалж: Business Insider