ОХУ-ын батлан хамгаалах яам Украины дайнд ашиглахаар олон тооны пуужин, их бууны сумыг Умард Солонгосоос авахаар ажиллаж байгаа тухай АНУ-ын тагнуулын албаны шинэ тайланд мэдээлжээ.
Энэ алхам нь экспортын хяналт, хоригийн улмаас Оросын зэвсэгт хүчин хангамжийн хомсдолд орж эхэлсний илрэл болохыг АНУ-ын нэрээ нууцалсан албаны эх сурвалж "Нью-Йорк Таймс" сонинд ярьсан байна.
Өнгөрсөн сард Оросын зэвсэгт хүчин Иран улсад үйлдвэрлэсэн нисгэгчгүй байлдааны онгоц буюу дроны эхний хэсгийг хүлээж авсан нь үнэн болохыг Байдены засаг захиргаа саяхан баталсан юм.
Гэхдээ Оросын тал Ираны дроныг Украины дайнд ашиглахад техникийн нэлээд асуудалтай тулгарч байгаа тухай мэдээлэл авснаа Цагаан ордон өнгөрсөн долоо хоногт сэтгүүлчидтэй хуваалцаж байв.
Ираны талаас Мохажер-6 болон Шахед ангиллын дронуудыг ОХУ-д нийлүүлж эхэлсэн байна.
ОХУ-ын Украинд хийж буй эзлэн түрэмгийлэх дайныг хамгийн их дэмжиж буй улсуудын нэг Умард Солонгос буюу албан ёсны нэрээр БНАСАУ юм.
Пёньяны дэглэм дайны дараах дорнод Украины сэргээн босголтод ажиллах хүч илгээх сонирхлоо илэрхийлээд байгаа.
Тус улсын Москвад суугаа элчин сайд Украины Донбассын бүс нутгаас салан тусгаарласан хоёр тоглоомын улсын төлөөлөгчдийг хүлээн авч уулзахдаа энэ саналаа илэрхийлсэн юм.
Донецк, Луганскийн Бүгд Найрамдах Улсуудын тусгаар тогтнолыг Орос, Сири улсуудаас гадна Умард Солонгос хүлээн зөвшөөрөөд байна.
Солонгосын хойг Японы колоничлолоос чөлөөлөгдсөний түүхэн ойн өдөр буюу наймдугаар сарын 15-ны өдөр ОХУ-ын ерөнхийлөгч Владимир Путин, БНАСАУ-ын удирдагч Ким Жон Ун нар харилцан баярын мэндчилгээ солилцож байв.
Москва, Пёньяны харилцаа 1948 оноос эхлэлтэй. Тухайн үед Зөвлөлт Холбоот Улсын эрх баригчид Ким Жон Уны өвөг эцэг Ким Ил Сунд дэглэмээ байгуулахад нь тусалж байжээ.
1991 онд задрах хүртэл нь Умард Солонгосын эдийн засаг Зөвлөлт Холбоот Улсаас ихээхэн хамааралтай байв. Сүүлд Путиний засаглалын үед хоёр орны харилцаа дахин сэргэсэн юм. Украинд дайн эхэлснээс хойш Өрнөдийн орнуудын дарамт шахалт хоёр улсыг улам ойртуулаад байна.
Эх сурвалж: Associated Press
