Украины ерөнхийлөгч Володимир Зеленский өчигдөр хийсэн ээлжит мэдэгдэлдээ тус улсын зэвсэгт хүчин Орост эзлэгдээд байсан Харьков мужийн 400 км.кв нутаг дэвсгэрийг чөлөөлсөн тухай зарлажээ.

“Энэ долоо хоногт бид Харьков мужаас сайхан мэдээтэй байна. Та бүхэн Украиныг хамгаалагчдын сүүлийн үеийн үйл ажиллагааны талаар мэдээллийг харсан байх. Хүн бүр манай дайчдаар бахархаж байгаа гэж би бодож байна” гэж тэр хэлсэн юм.

Харьков бол ОХУ-тай хиллэдэг муж бөгөөд мужийн төв Харьков хот дайны эхэн үед хэдэн сарын турш бөмбөгдүүлж байв.

Хэрвээ Зеленскийн өгсөн мэдээлэл батлагдвал энэ нь Украины армийн сөрөг довтолгооны томоохон амжилт юм. Гэхдээ гуравдагч эх сурвалжууд ч Украины амжилтыг баталж байна. Вашингтонд төвтэй ISW (The Institute for the Study of War) судалгааны хүрээлэн Украины арми сүүлийн өдрүүдэд фронтын шугам дээр томоохон ахиц дэвшил гаргасныг баталжээ.

“Украины зэвсэгт хүчин есдүгээр сарын 7-ны өдөр зүүн бүсийн Харьков мужийн Орост эзлэгдсэн нутаг дэвсгэрт санаанд оромгүй тактикийн амжилт гаргаж, хамгийн багадаа 20 км давшиж, 400 орчим хавтгай дөрвөлжин километр газар нутгийг чөлөөлсөн байна” гэж тус байгууллагаас мэдээлсэн юм.

Оросын тал Харьковт газар нутаг алдсан талаараа албан ёсоор мэдээлээгүй байгаа юм. Харин Оросын албан бус эх сурвалжууд, цэргийн шинжээчид арми нь ухарсныг хүлээн зөвшөөрч, яаралтай хүч нэмэгдүүлэх шаардлагатай болсныг мэдээлж байна.

Энэ үйл явдалтай зэрэгцэн АНУ-ын төрийн нарийн бичгийн дарга Энтони Блинкен өчигдөр Киев хотод гэнэтийн айлчлал хийжээ.

Айлчлалынхаа үеэр тэр АНУ-ын засаг захиргаа Украин болон Оросын аюул заналд ойр байгаа Европын 18 орны батлан хамгаалах салбарт нийт $2 тэрбумын урт хугацааны тусламж үзүүлэх болсныг мэдэгдсэн байна.

Өчигдөр өглөө Германы Рамштайн дахь цэргийн баазад болсон хуралд оролцохдоо АНУ-ын батлан хамгаалахын сайд Ллойд Остин $675 саяын зэвсэг техникийн тусламжийг Украинд нэмж үзүүлэх болсныг бас зарласан юм.

Уг багцад их буу, их бууны сум, Humvee хуягт автомашин, хуяглагдсан түргэн тусламжийн автомашин, танк эсэргүүцэх систем зэрэг бусад зэвсэг техникүүд багтжээ.

Ингэснээр Байдены засаг захиргааны Украинд үзүүлсэн тусламжийн хэмжээ $15.2 тэрбумд хүрч байна.

Эх сурвалж: Reuters