АНУ-ын Ерөнхийлөгч Жо Байден Украинд цэргийн тусламж үзүүлэх шинэ багцыг баталлаа гэж Пентагоны тэргүүн Ллойд Остин Герман дахь Рамштайн агаарын баазад АНУ тэргүүтэй Украины Батлан хамгаалахын холбоо барих бүлгийн хуралдааны үеэр мэдэгдэв.
АНУ-ын Батлан хамгаалахын сайд “Өчигдөр Ерөнхийлөгч Украинд 675 сая ам.доллараар хэмжигдэж буй тусламжийн шинэ хэсгийг баталлаа.
Тиймээс энэ багцын хүрээнд АНУ Украинд байлдааны Humvee жип машин, их бууны сум, 105 мм-ийн гаубиц, HARM радарын эсрэг пуужин, GMLRS пуужин, танк эсэргүүцэх систем, жижиг зэвсэг болон бусад олон зүйлийг нийлүүлнэ гэж Остин хэлэв.
Энэ нь өнгөрсөн оны наймдугаар сараас хойш Цагаан ордны шийдвэрээр АНУ-ын нөөцөөс зэвсэг техник гаргаж байгаа хорь дахь тохиолдол" гэдгийг тэрээр дурдав.
Вашингтон Пост сонинд мэдээлснээр, шинэ тусламжийн багцад HIMARS-д зориулсан сум багтах болно. Байдены засаг захиргаанаас Украинд үзүүлсэн цэргийн тусламжийн нийт хэмжээ 10 тэрбум доллараас давжээ.
Украинд барууны цэргийн техник нийлүүлэх нь мөргөлдөөнийг уртасгаж, зэвсэг тээвэрлэх нь Оросын армийн хууль ёсны бай болж байгааг Москва нэг бус удаа онцолж байгаа юм.
Эх сурвалж: Toim.mn