БНХАУ-ын Сычуань мужийн 21 сая хүн амтай Чэнду хотод тогтоосон хатуу хөл хорионы дэглэм сулрах төлөвгүй байгаа тухай өнөөдөр "Си Эн Эн" мэдээлж байна. АНУ-ын технологийн томоохон компанийн үйлдвэрлэлийн төв болсон Чэнду хотод тогтоосон хөл хорионы хугацаа лхагва гарагт дуусгавар болох байсан ч хотын захиргаа хөл хорионы дэглэмээ дахин сунгаж байгаагаа мэдэгджээ.
Хотын захиргааны мэдээлж байгаагаар олон нийтийн шинжилгээ өдөр бүр үргэлжилнэ. Долоо хоногийн хугацаанд олон нийтийн дунд тархсан халдварыг бүрэн зогсоохоор төлөвлөж байгаагаа мэдэгдэж байна.
Өнгөрсөн дөрөвдүгээр сард Шанхай хотод хоёр сарын хугацаанд тогтоосон хөл хорионоос хойш Чэнду хот нь бизнесийн үйл ажиллагаа, өдөр тутмын амьдрал нь бүрэн зогссон Хятадын хамгийн том метрополис хот болж байна.
Өнгөрсөн пүрэв гарагийн байдлаар Хятад улсын хэмжээнд 1439 шинэ тохиолдол бүртгэгдсэн бол Чэнду хотод шинээр 116 тохиолдол бүртгэгджээ.
Өнгөрсөн сарын хугацаанд тус хотын хэмжээнд нийтдээ 1800 тохиолдол бүртгэгдсэн нь Хятадын цар тахлыг тэглэх стратегийн дагуу тогтоосон стандартаас даруй хэд дахин өндөр үзүүлэлт болж байна. Иймд Чэнду хотын захиргаа төдийгүй, Хятадын эрүүл мэндийн байгууллагаас хөл хориог хатуу чанд баримтлах, дэглэмийн хугацааг сунгаж, иргэдийг хэд хэдэн удаагийн шинжилгээнд хамруулж байна.
Өнгөрсөн наймдугаар сарын сүүлчээс хойш өнөөдрийн байдлаар Хятад улсын хэмжээнд нийтдээ 70 гаруй хотод 300 гаруй сая хүнийг хамарсан хөл хорио, хязгаарлалтын дэглэм үргэлжилж байна.
Пүрэв гаригйин байдлаар Хятадад эрсдэл өндөртэй 1604, дунд зэргийн эрсдэлтэй 1730, эрсдэл багатай 309 бүс нутаг байгааг тус улсын Эрүүл мэндийн үндэсний хорооноос мэдээллээ.
Өндөр эрсдэлтэй бүсэд багтаж байгаа иргэдийг гэрээсээ гарахыг хатуу хориглож, харин эрсдэлийн зэрэг дунд ангилалд багтаж байгаа иргэдийн хувьд гэрээсээ гарах, хороололдоо салхилах зэргийг зөвшөөрч байна.
Эх сурвалж: Mnb.mn
