Украины армийн хурдтай довтолгоо Бямба гарагт үргэлжилж, Оросын цэрэг тус улсын зүүн хойд хэсэг дэх гол бэхлэлтээ орхин ухарчээ.
Тодруулбал Оросын “цэргийн тусгай ажиллагаа”-ны ложистикийн гол төвүүдийн нэг болж байсан Изюм хот Украины цэргийн хяналтад шилжсэн байна.
Оросын батлан хамгаалах яам цэргүүддээ Изюмээс ухарч, зэргэлдээ Донецк мужийн байрлалуудад хүчээ хуримтлуулах тушаал өгснийг ТАСС агентлаг өчигдөр мэдээлжээ.
Харьков мужийн эзлэгдсэн газар нутгийн захиргаа иргэдэд амьдарч буй газраа орхин явах заавар өгсөн тухай бас мэдээлсэн байна. Бямба гарагийн орой хийсэн ээлжит мэдэгдэлдээ Украины ерөнхийлөгч Володимир Зеленский “Өнөөдөр Оросын арми хийж чаддаг хамгийн сайн зүйлээ харуулж, нуруугаа харуулан зугтааж байна” гэж хэлжээ.
Сөрөг довтолгоо эхэлснээс хойш Украины арми Оросын цэрэгт эзлэгдсэн 2,000 орчим хавтгай дөрвөлжин километр газар нутгийг чөлөөлөөд байгааг тэр мэдээлсэн байна.
Украины ерөнхийлөгчийн тамгын газрын дарга Андрей Ермак хотын захад авхуулсан цэргүүдийнхээ зургийг усан үзмийн эможитой цуг сошиал хуудсандаа нийтэлжээ. Юзюм нь “үзэм” гэсэн утгатай үг юм.
Дараа нь Ермак твиттер хуудсандаа “Оросын арми дэлхийн хамгийн хурдан зугтдаг арми гэсэн цолыг хүртлээ” хэмээн хошигнон бичсэн байна.
Юзюмийг эзлэхээс хэдхэн цагийн өмнө Украины арми Оросын армийн хангамжийн гол төв болж байсан төмөр замын өртөө Купянск хотыг эзлэн авсан юм. Бямба гарагийн өглөө Украины албаныхан Купянск хотын захиргааны байран дээр далбаагаа мандуулсан өөрийн армийн цэргүүдийн зургийг тарааж байв.
Ер нь зүүн фронт дээрх Оросын бусад байрлалууд ч хүнд байдалд байгаа мэдээ ирсээр байна.
Балаклея, Гракове зэрэг Харьков мужийн тосгон сууринууд чөлөөлөгдсөнийг орон нутгийн хүмүүс мэдээлжээ. Украинтай хил залгаа ОХУ-ын Белгород мужийн захирагч Вячеслав Гладков хил даван дүрвэж ирсэн хүмүүст хүнс, эмнэлгийн тусламж үзүүлж эхэлснээ мэдээлсэн байна. “Өнөөдөр би зах дээр Купянскаас ирсэн маш олон хүнтэй таарлаа. Тэд Украины арми хотынх нь талыг эзэлж, Оросын цэрэг ухарч байгаа тухай болон байлдааны галын шугам улам ойртож байгааг ярьж байна” гэж Белгород мужийн Балуйки тосгоны иргэн хэвлэлд ярьжээ.
Белгород мужид Украины талаас 400 гаруй автомашинтай дүрвэгч орж ирснийг Нэгдсэн Орос намын сенатор Андрей Турчак хэвлэлд ярьсан байна.
Эх сурвалж: Reuters
