Цагдаагийн байгууллагад энэ оны наймдугаар сарын 30-ны 11:33 цагт Хан-Уул дүүргийн 4 дүгээр хорооны нутаг дэвсгэрт байрлах хотхоны ...... тоотод “Хулгай орсон байна” гэх дуудлага, мэдээлэл бүртгэгджээ.

Мэдээллийн дагуу жижүүрийн шуурхай бүрэлдэхүүн хэргийн газрын үзлэг явуулахад иргэний гэрээс их хэмжээний америк доллар, үнэт эдлэл, дунд гарын хаш хөөрөг зэрэг их хэмжээний үнэ бүхий эд зүйл алдагдсан байна.

Нийслэлийн Цагдаагийн Удирдах Газрын Мөрдөн шалгах газрын Хулгайлах гэмт хэрэгтэй тэмцэх хэлтсийн алба хаагчид мөрдөн шалгах ажиллагааг шуурхай явуулахад дээрх хэргийг үйлдсэн этгээд нь наймдугаар сарын 26-ны өдөр саатуулагдсан, 31 настай эрэгтэй болох нь тогтоогджээ.

Тухайн этгээд наймдугаар сарын 25-нд уг гэмт хэргийг үйлдсэн бөгөөд шалгалтаар нийт долоон удаагийн үйлдлээр хулгайлах гэмт хэрэг үйлдэж бусдад их хэмжээний хохирол учруулсан байж болзошгүй нөхцөл байдал тогтоогдсон байна. Тэрбээр хулгайлсан эд зүйлсээ нууж, бусдад зарж, борлуулсан байсныг тогтоон хулгайн эд зүйлийг хураан авч мөрдөн шалгах ажиллагааг үргэлжлүүлж байгааг цагдаагийн байгууллагаас мэдээлэв.

Тайлбар: Хохирогч наймдугаар сарын 25-30-нд гэртээ байхгүй байсан бөгөөд 30-ны өдөр ирээд хулгай орсныг мэдэж, цагдаад хандсан байна.