Өчигдөр Кремлийн хэвлэлийн төлөөлөгч Дмитрий Песков сэтгүүлчидтэй уулзахдаа Оросын армийн Харьковт явуулж буй хүчээ татан төвлөрүүлэх, дахин хуваарилах үйл ажиллагааны талаар ерөнхийлөгч Владимир Путин бүрэн мэдээлэлтэй байгааг мэдэгджээ.
“Мэдээж цэргийн тусгай ажиллагааны үеэр манай зэвсэгт хүчний явуулж буй үйл ажиллагааны тухай бүх мэдээлэл ерөнхий командлагчид хүрч байгаа” гэж Песков энэ талаар сэтгүүлчийн асуултад хариулсан байна.
Тэрбээр “Ерөнхийлөгч батлан хамгаалахын сайд болон зэвсэгт хүчний командлагчтай 24 цагийн турш байнгын холбоотой байгаа. Цэргийн тусгай ажиллагааны үеэр өөрөөр байх боломжгүй нь мэдээжийн хэрэг” гэж нэмж тайлбарлажээ.
Төрийн тэргүүн зэвсэгт хүчнийхээ явуулж буй ажиллагаанд итгэлтэй хэвээр байгаа эсэхийг асуухад Песков “Цэргийн тусгай ажиллагаа анхны зорилгодоо бүрэн хүрэх хүртэл үргэлжлэх болно” гэж товч хариулсан байна.
Харин ОХУ-ын армийн баруун тойргийн командлагчийг огцруулсан гэх мэдээлэл үнэн эсэхийг лавлахад тэр “Үүнийг батлан хамгаалах яамнаас асуух хэрэгтэй” хэмээн шууд хариулахаас зайлсхийсэн юм.
Эх сурвалж: ТАСС