Зэвсэгт мөргөлдөөн, уур амьсгалын өөрчлөлт, цар тахал зэрэг хүчин зүйлс орчин үеийн боолчлолын аюулыг улам бүр нэмэгдүүлж буй талаар Нэгдсэн Үндэсний Байгууллагын (НҮБ) шинэ тайланд бичжээ.
НҮБ-ын харьяа Олон Улсын Хөдөлмөрийн Байгууллагын (ОУХБ) тооцоолсноор өнөөдөр дэлхий дахинд 50 сая хүн буюу 150 хүн тутмын нэг нь албадан хөдөлмөр, албадан гэрлэлтийн золиос болж байгаа гэнэ.
Таван жилийн өмнө энэ тоо 10 сая орчим байжээ.
“Хүмүүний суурь эрхийг зөрчиж буй энэ үзэгдлийг юугаар ч зөвтгөх боломжгүй. Бид юу хийх ёстойг мэднэ. Үүнд бүх талын арга хэмжээ хэрэгтэй. Үйлдвэрчний эвлэлүүд, ажил олгогчид, иргэний нийгэм, жирийн иргэд бүгд чухал үүрэгтэй” гэж ОУХБ-ын ерөнхий захирал Гай Райдер хэлжээ.
Орчин үеийн боолчлол зөвхөн ядуу буурай орнуудад хамаатай биш, бүх тохиолдлын талаас илүү хувь нь дундаас дээш болон өндөр орлоготой улс орнуудад оногдож буйг ОУХБ мэдээлсэн байна.
“Албадан хөдөлмөр олон жил үргэлжилдэг бол албадан гэрлэлт насан туршийн ял болж байна” гэж ОУХБ-ын тайланд бичжээ.
Боолын хөдөлмөр эрхэлж буй 27.6 сая хүний 3.3 сая нь хүүхэд байна. Тэдгээр хүүхдүүдийн талаас илүү хувь нь бэлгийн мөлжлөгийн золиос болж байгаа ажээ.
Дэлхий даяар нийтдээ 22 сая орчим хүн бусадтай хүчээр гэрлэсэн байгаагийн гуравны хоёроос дээш хэсэг нь эмэгтэйчүүд байна. 15 нас хүрэхээсээ өмнө гэрлэгсэд тэдгээрийн багагүй хувийг эзэлж буй тухай тайланд дурджээ.
Эх сурвалж: BBC
